١٠ أماكن لغدا الأحد مع العيلة بلبنان!

نهار الأحد يعني غدا مع العيلة، قعدة بتروق الأعصاب، وسفرة فيها من كل صنف ولون. وبدل ما تحتاروا كل أسبوع وين تروحوا، نحنا جمعنالكن ١٠ مطاعم فيهن أكل بجنن، قعدة مرتبة، وأجواء قريبة على القلب.

١. خيمة المزار، بيت مري

محل ولا أروع بين أحضان الصنوبر ببيت مري. من أول ما توصلوا، بتحسوا بالراحة وبالجو الجبلي. الطاولات والكراسي ولا أهضم وفي مساحة خضرا حوالين المطعم بتفتح النفس. أكلن لبناني أصيل، من مشاوي، لفتوش، معجنات وكبب، وكل شي بينعمل طازة. والولاد؟ عندن مساحة ألعاب، بينبسطوا فيها عالآخر.

الرقم: 481 870 04

٢. أبو جوزيف، جبيل ووادي قنوبين

القعدة بسيطة بس مليانة دفا وحب. بتبلشوا بمازة لبنانية بتشهي: حمص، تبولة، بطاطا حرة، ورق عنب، كبة، رقاقات، وبعدها فيكن تطلبوا الكبة الصاجية يلي بيعملوها على الطريقة الشمالية الأصلية. القعدة بتطل عالطبيعة أو البحر، والهوا نضيف. وإذا معكن ولاد، في زاوية زغيرة بيلعبوا فيها.

الرقم: 269 798 03

٣. فاضل، بكفيا

قعدة غير شكل ومرتبة بالجبل. من أول ما تفوتوا بتحسوا حالكن بالضيعة. الخدمة سريعة، والمينو في كل شي بتشتهو، من مأكولات تقليدية لبنانية لمشاوي سخنة وطرية. بيقدموا جميع أطباق المازة، سلطلت فريش ومقبلات سخنة وباردة. الجو مناسب لكل الأعمار، وفيكن تضلوا للسهرية وتشوفوا المغيب.

الرقم: 979 980 04

٤. كرم ع درب، فيطرون

بين جبال فيطرون، هيدا المطعم اللبناني جايبلكن أطيب الأكلات. الأكل لبناني عأصولو: مشاوي، معجنات وحلويات ومقبلات ما بتخلص. القعدة حلوة، والمكان دافي وبتحسوا حالكن ببيت ضيعة. مناسب لجمعة عيلة أو أصحاب، والخدمة عنجد بتعقد.

الرقم: 383 333 09

٥. منارة الخليج، المعاملتين

لكل حدا بيحب السمك والأكل البحري، هيدا المحل بيطير العقل. الطاولات عالتراس وبتطل دغري عخليج جونية، كأنكن ع البحر. عندن سمك مشوي، مقلي، مأكولات بحرية، وأطباق المازة اللبنانية. كل شي فريش وطازة. القعدة حلوة للعيلة، وبالأخص وقت المغيب.

الرقم: 678 856 09

٦. مطعم شبلي، النعص

مطعم إلو سنين وصيتو سابقو: طعمة وجودة عالية، منظر حلو، وخدمة مميزة. أكلن بيتوتي وعندن أطباق المازة اللبنانية لي بترضي الكل. معروفين بالفوارغ والكراعين لي بيتفننوا فيهن. الستاف دايماً مهتمين بكل حدا، والمينو لبناني عأصولو. القعدة مرتبة، في صالة داخلية، وفي تراس جبلي حلو. مثالي لغدا أو عشا الأحد مع الأهل والأصحاب.

الرقم: 799 980 04

٧. بيت حلب، عين المريسة وأنطلياس

الأكل الشرقي إلو نكهة خاصة، وهالمطعم بيقدمو علي أصولو. من المشاوي للكبة، للتبولة الشامية، والطبخات التراثية اللي بتشهي. الديكور تراثي مع نفحة موديرن وبياخدكن ع البيوت الحلبية العريقة. ومتل ما بيقولوا: الأكل الحلو بدو ناس تعرف تعملو وناس تعرف تستمتع في. وهون أكيد رح تستمتعوا بكل لقمة مع أحبابكن.

الرقم: 070 109 76

٨. عزيزة، ضبية

إذا بدكن أكل لبناني بس مع لمسة موديرن، روحوا على “عزيزة”. المازة عندن معمولة بستايل خاص، وبتجي مزينة بطريقة مميزة. السبيشال عزيزة هوي الطبق يلي لازم تجربوا، مزيج نكهات وتتبيلة ما بتشبه شي. الديكور عصري والقعدة شيك، خرج غدا عيلة أو مناسبة خاصة.

الرقم: 333 543 04

٩. فريدة، عجلتون

قعدة بتاخدكن على قلب الطبيعة والرواق والهوا النضيف. فيكن تختاروا تقعدوا عالتراس أو جوا. الأكل لبناني تقليدي، بس مع لمسة خاصة. كل طبق معمول بحرفية، من المقبلات للأطباق الرئيسية. فريدة مثالي لمناسبات العيلة، أو لغدا نهار الأحد بعيد عن العجقة.

الرقم: 511 835 71

١٠. السراي، ساحل علما

مطعم مرتب عالآخر، القعدة واسعة، وفي تراس بيطل عالبحر بياخد العقل. المازة اللبنانية منوعة ومليانة نكهات، من الفتوش للحمص والمشاوي. أما السمك، فطازة يوم بيوم، بينشوى أو بينقلى حسب طلبكن وعندن مأكولات بحرية. الأجواء عائلية، في موسيقى خفيفة، والخدمة كتير سريعة. السراي خيار مثالي إذا بدكن تتغدوا أو تحتفلوا بمناسبة بمحل بيجمع الطعمة والمنظر.

الرقم: 111 938 70

عجبكن هيدا المقال عن أماكن لغدا الأحد مع العيلة بلبنان؟ شوفوا كمان، ١٥ محل بيعملوا شوكولا وزينة لمناسباتكن الحلوة.