عيشوا تجربة رعي المعزة والنحل مع بوفيه بنص الطبيعة هون

خلينا نعرفكن على بيت ضيافة مهضوم وقاعد بقلب الطبيعة: مزرعة الجوبي.

هيدا المحل بيجمع كل شي منحبو بمكان واحد، الطبيعة، الأكل الطيب، الحيوانات والنومة الهنية مع المناظر الحلوة.

الجوبي عبارة عن بيت ضيافة قاعد بقلب الطبيعة، مناسب للكبار والزغار، وبيجمع كل شي بتحبوا بمطرح واحد.

أول ما توصلوا، بتحسوا حالكن نقلتوا من المدينة دغري عضيعة زغيرة. في معزة، دجاج، ونحل! فيكن تشاركوا بالرعي، تطعموهن، وتتعرفوا علين عن قريب. الولاد أكيد رح يكيفوا بهيك تجربة خارجة عن المألوف.

الأجواء كتير مريحة، وكل شي هيك عفوي وعلى طبيعتو. الولاد بينبسطوا، والكبار بيلاقوا فرصة ليهدا راسن شوي من بعد ضغط الأسبوع.

غير هيك، كل فترة بيعملوا بوفيه مفتوح بقلب المطعم. بتقعدوا تحت الشجر، وبتاكلوا أكل بيشهي. كل شي طازة ومعمول بالبيت، من المعجنات للمازة والكبب، وكمان سلطات ومقبلات وطبخات تراثية.

وفي مفاجأة حلوة: عندن ضيافة المتة! متة على أصولها مع كل الإضافات يلي بتحلمو فيها من جوز، لوز وفواكة مجففة… قرقعوا متة قد ما بدكن.

وبالنسبة للنومة أكيد إنتو بحاجة لهيك تجربة بقلب الطبيعة. بتناموا بقلب بيت ضيعة مهضوم مزين بالزهور وبتفيقوا الصبح على صوت العصافير وبتشربوا ركوة قهوة مع قطعة غاتو على التراس.

المحل بريح النفسية، ومثالي لعطلة بالطبيعة مع العيلة، بعيد عن العجقة والعالم. خدو عيلتكن وروحوا جربوا النومة عندن، ما رح تندموا.

العنوان: الرملية، عاليه
الرقم: 726 680 03

شوفوا كمان، غابة خندق الرهبان: جوهرة مخفية بقلب بعبدا.