وين فيكن تجربوا بوظة على ماتشا بلبنان؟ شوفوا هالمحلات!

كلنا بلبنان مشينا بترند “ألو، بيلاتس، ماتشا”، وما في أحلى من إنو هالترند وصل على عالم البوظة! شو رأيكن تجربوا البوظة على ماتشا بأماكن بتقدمها بأسلوب فريد؟ جمعنالكن ٣ محلات بلبنان عم يعملوا هالنكهة المميزة، وكل واحد بيقدمها بطريقتو الخاصة يلي بتخليكن تغرموا بالماتشا بعد أكتر وأكتر.

١. La Glace de Badiane، النقاش

هون تجربة الماتشا مختلفة بس طبيعية! طعمة البوظة على ماتشا طبيعية عالمزبوط… اللون الأخضر الجذاب، الريحة يلي بتشق القلب، والإحساس الفريش يلي بيدوب بالتم… من أول كدشة، رح تصيروا مدمنين! هيدا المحل عم يعملكن البوظة بطريقة صحية بس بتجي بتبورد القلب. والأحلى؟ مصنوعة من مواد طبيعية مية بالمية، من دون أي إضافات. هيدا المحل بيهتم بالتفاصيل، وبيعرف كيف يخلي تجربة البوظة متعة حقيقية.

الرقم: 884 844 03

٢. Oslo، فردان & مار مخايل

بقدموا بوظة على ماتشا مغطاية بقطع الراحة الوردي، مزيج ولا أروع بين النكهة اليابانية والنكهة التركية. البوظة عندن معمولة من مكونات طبيعية بجودة عالية، والطعم بيعكس هالاهتمام بالتفاصيل. وإذا عبالكن شي جنب البوظة، عندن كيكات قطنية بتشهي، وأنواع بوظة غير شكل، وحتى مشروبات متل الميرينغي يلي بتكمل التجربة.

الرقم: 196 793 01

٣. Gou، الجميزة

المحل جديد وعصري، الجو في نفحة يابانية وبيعملوا إيام حفلات موسيقية، والستايل ترندي بكل معنى الكلمة. وبس نحكي عن ترند أكيد ما فينا ما نذكر الترند الأول بلبنان: الماتشا. الماتشا هون مش بس مشروب، صار في منو بوظة ماتشا ميري كريم ناعمة وخفيفة، لكن بنكهة قوية ما بتشبه شي جربتوا من قبل. مينو الأكل عندن كمان في كل شي، من البرانش، ل poke bowls وحتى الأكلات اليابانية الشعبية. والأحلى من هيك؟ عندن تشكيلة حلويات، مشروبات، كوكتيلات واسعة بتكمل القعدة بأجواء حلوة.

الرقم: 526 569 76

شوفوا كمان، آخر إختراعات اللبنانية: آيس كريم شاورما ببيروت!