بعد غياب طويل عن الساحة الفنية، مي حريري رجعت بغنية جديدة!

بعد غياب طويل عن الساحة الفنية، رجعت مي حريري بغنية جديدة عنوانها “لا تغلط“، ومن أول ما نزلت، لفتت الأنظار بصوتها، حضورها، ورسالتها القوية. بعد غياب 7 سنين عن الساحة. الفنية، قررت مي ترجع بغنية بتحاكي مشاعر الناس، وخاصة يلي مرقوا بتجارب صعبة بعلاقاتن العاطفية.

مي حريري، المعروفة بصوتها الرومانسي والحنون، واللي كلنا حبيناها بغنية “حبيبي إنت” للموسيقار الراحل ملحم بركات، اختارت هالمرة تغني بإيقاع خليجي عصري، ولغة بيضا بسيطة، بتوصل بسرعة لكل المستمعين من لبنان للدول العربية والخليج.

الغنية من إنتاج شركة وتري، يلي عطول بتهتم بدعم الأصوات القوية والشابة. وعم تشتغل حالياً على أعمال فنية مميزة لموسم الصيف، و”لا تغلط” مبين إنها داخلة بقوة على ترندات أغاني صيف 2025. صورت مي غلاف الغنية على البحر، وطلت بفستان أزرق سماوي بألوان مموجة، أضاف لمسة صيفية عالجو العام.

من ناحية الكلمات، ف “لا تغلط” من كتابة عامر لوند، ألحان علي حسون، وتوزيع طوني سابا. أما الميكس والماسترينغ فكان من محمد المقهور، والتوزيع الرقمي استلمتو وتري. يعني كل التفاصيل مدروسة لتكون الغنية متكاملة صوت وصورة.

أجواء الغنية فيها كرامة، قوة، ورسالة واضحة. “لا تغلط” مش بس غنية حب أو فراق، هي نوع من المواجهة، ومن الوقفة مع النفس بعد علاقة مؤذية أو تجربة صعبة. الكلمات بتحفز الشخص على إنو يوقف على إجريه ويرجع يكمل حياتو من بعد نكسة من دون وجع أو ندم.

الميك آب كان من توقيع رولا سليمان، أما الشعر فكان من صالون OHAIR، والتصوير بإدارة المصور مارك مارون. الإطلالة كلها متناسقة مع الجو العام للغنية، ناعمة، راقية، وفيها كتير من الأنوثة والنضج… وأكيد الأجواء الصيفية.

الغنية موجودة على YouTube على طريقة ال Lyrics Video، وهيدا الشي بيسمح لكل حدا يحفظها بسهولة ويغنيها مع مي كلمة بكلمة. وهيدا النوع من الفيديوهات صار محبوب بلبنان وبيساعد الأغاني توصل لعدد أكبر من الناس، خاصة عبر السوشال ميديا.

فإذا كنتوا عم تمرقوا بتركة جديدة، أو بدكن تطلعوا من علاقة منا منيحة، يمكن هالغنية تكون الصوت يلي عم تحسوا وما عم تقدروا تعبروا عنو.

شوفوا كمان، وقت زار شارل أزنفور السيدة فيروز ببكفيا.