٨ محلات كروسان لازم تجربوهن بلبنان!

مين منا ما بيعشق ريحة الكرواسون الطازة الصبح؟ الطراوة، القرمشة، والنكهة يلي بتخلي نهارنا يبلش بنشاط وحيوية! تعرفوا معنا على هال ٨ محلات بلبنان لي عم يعملوا كرواسون مع حشوات مميزة.

١. Kroissant، الزلقا

هالمحل إسم على مسمى، متخصص بالكرواسون وبيقدم نكهات بتاخد العقل. الكروسان هون مش بس طازة وسخنة، طعمتها بتدوب بالتم. إذا كنتوا بالزلقا، لازم تزوروه وتجربوا الكرواسون السادة أو المحشية بالشوكولا الكريمي، الزعتر مع خضرا أو اللوز. طراوة العجينة وريحة الخبزة بياخدو العقل، وهيك بتكونوا بلشتوا نهاركن بأحلى طريقة.

الرقم: 431 977 71

٢. مون كرواسون

مون كرواسون صاير ترند بكل لبنان بفضل الطعمة المميزة والفروع المنتشرة وين ما كان. بيتميز بخياراتو المتنوعة من الحلو والمالح، متل كرواسون الفريز مع الكريمة الحلوة، أو كرواسون الجبنة والحبش يلي طعمتها بتفاجئكن. آخر اختراعاتن كرواسون محشي صوص شوكولا دبي!

العنوان: الدكوانة، زوق مكايل، الأشرفية، سوق الزلقا، المنصورية، بيت الكيكو، بعبدا، الحازمية، الكورة، البترون
الرقم: 338 335 81

٣. كرواسون بار، جبيل

بوسط السوق العتيق بجبيل، هالكافيه المهضوم صار وجهة أساسية لكل محبي الكرواسون. جربوا الكرواسون على فستق أو الكرواسون على كنافة، مزيج ولا أروع! وللي بحب الطعمة المالحة، ما في أطيب من كرواسون الحلوم وبيستو مع فنجان قهوة تركية. القعدة هون بتجمع بين النكهة والتجربة الساحرة للسوق التراثي.

الرقم: 305 488 81

٤. Le Croissant Perdu، برمانا

هالمحل ببرمانا مش بس محل كرواسون، هوي تجربة بحد ذاتها! إذا كنتوا بالمنطقة وعبالكن ترويقة أو عصرونية مهضومة، ما إلكن غير هالمكان. الكرواسون سندويش عندن محشية طعمات مالحة متل البيض وجبنة الحلوم وموزاريلا وحتى هوت دوغ وغيرن من الطعمات. الحلاوة مع الحشوات متل الكرواسون بالكنافة أو صوص الفستق الخضرا بتخلي كل لقمة قصة مختلفة. هون فيكن تغطسوا الكرواسون بقلب فنجان القهوة وهيدا كل شي بتحتاجو لنهار مميز.

الرقم: 170 817 81

٥. Go Croissant، البترون

الكرواسون هون طازة وسخنة، ريحتها بتشق القلب. جربوا كرواسون اللوتس أو الكيندر، حشوة غنية ونكهة بتعلق براسكن. وكمان بيعملوا كرواسون محشي صوص شوكولا دبي وطعمات مالحة مختلفة.

الرقم: 475 175 76

٦. Croissant Hallab الحمرا، السوديكو، الدكوانة

الكرواسون عندن مستوى تاني من الطعمة. جربوا الكرواسون باللوز، أو بالشوكولا، وكمان الكرواسون المحشية بالكريمة الطازة. التفاصيل الزغيرة، من القرمشة للحشوات، بخلو الكرواسون هون أطيب ترويقة أو وجبة خفيفة على العصرونية، رح تاكلوا صابيعكن وراها!

الرقم: 715 721 03

٧. Croissant de Paris، ميروبا وأدونيس

 الكرواسون مالحة وحلوة، بتطلع طرية وبتقرمش ومليانة بالطعمات، طازة وريحتها بتاخد العقل. جربوا الكرواسون الكلاسيك أو المحشية بالزعتر للنكهة اللبنانية بلمسة فرنسية. المكان عندو تشكيلة فريدة لكل عشاق المخبوزات.

الرقم: 526 589 03

٨. كرواسون الشيخ، عين الرمانة

بمحل زغير و عأدو، كرواسون الشيخ بيقدم كرواسون من النوع يلي بتحلمو فيه! العجينة رقيقة ولونها الدهبي بيحكي عن القرمشة. الخيارات متنوعة من المالحة متل الجبنة، للكرواسون بالشوكولا يلي بيدوب بالتم! إذا كنتوا بالمنطقة، ما تفوتوا تجربة هالطعمات الشهية.

الرقم: 211 361 01

شوفوا كمان، هيدا المحل المهضوم بيعمل برويش ع الإيد وبوصل لكل لبنان.