شو فيكن تعملوا بقلب تعنايل؟ اكتشفوا جمال الطبيعة والأكل الطيب

تعنايل، المنطقة الحلوة يلي بتبعد تقريبا ساعة عن بيروت، هي مقصد لكل شخص بدو يكسر الروتين، يرتاح بالطبيعة، ويتعرف على جمال مخبى بلبنان. المنطقة مليانة نشاطات وأماكن مهضومة بتناسب الكل من العيلة للأصحاب. مشو معنا لنتعرف على كل الإشيا يلي فيكن تعملوها بقلب تعنايل.

1.اكتشفوا مزرعة Domaine de Taanayel

بتحبوا الطبيعة؟ المشوار بهيدي المزرعة غير شكل! فيكن تمشوا بين الشجر، تتعرفوا عالنباتات البرية، وحتى تستمتعوا باللعب مع حيوانات المزرعة ومشاهدة الطيور. وإذا عبالكن شوية مغامرة، استأجروا دراجة هوائية واستمتعوا بجولة بين أحضان الطبيعة.

وأكيد ما تنسوا تشتروا ألذ الألبان والأجبان الطازة من مزارعن! هيدا عدا عن سلات المونة يلي فيكن تحضروها!

الرقم: 861 383 81

2. زوروا بحيرة تعنايل

بحيرة بتسرق القلب بالمي العذبة يلي بتلمع بالشمس. فيكن تاخدوا لحظة هدوء هون. والأحلى إنكن تستكشفوا المنطقة حواليها على الدراجة أو حتى تركبوا خيل! بحيرة تعنايل مش بس جمال، هي واحة راحة نفسية بقلب البساتين.

خدوا أجمل صور لهيدا البيت يلي بنص البحيرة، هو بيت للبط كتير مهضوم!

3. زوروا مطعم خان المقصود

إذا بدكن قعدة بسيطة بالطبيعة مع أطيب لقمة لبنانية، ما في ألذ من خان المقصود. المطعم بيقدم مأكولات طازة من منتجات البقاع، وكاسة عرق بلدي بتكمل التجربة. هون القعدة غير شكل، وع البلدي.

الرقم: 279 124 03

4. اكتشفوا محمية دير تعنايل المميزة

بهالمحمية فيكن تكتشفوا كروم عنب واسعة، تتفرجوا عالحيوانات، وحتى تزوروا مزار سيدة لورد، النسخة اللبنانية عن المزار الفرنسي.

الطبيعة بهالمكان بتجمع بين التأمل والجمال.

الرقم: 192 511 03

5. عيشوا نهار مميز للعيلة كلها بقلب كاسكادا مول

هيدا المول أحلى محل للأكل، التسوق، اللعب للولاد بقلب البقاع. بتلاقوا كل شي، من الكافيهات، محلات التياب، ألعاب الولاد وحتى صالة باولينغ، وقريباً رح يفتحوا سينما!

ومش بس هيك، حتى عندن منتزه مائي اسمو Mambo Beach.في مسابح آمنة، 11 زحليطة مائية، ومطعم مهضوم. يوم عائلي بامتياز بين المتعة والأمان. هالمنتزه رح يفتح قريباً.

الرقم: 666 076 71

6. دوقوا نبيد البقاع من معصرة مسايا

لكل محبي النبيد والعرق، هالمكان ما بينتسى. الويك-أند هوي أحلى وقت تزوروها، جولة بالمعصرة وبعدها بوفيه مرتب مع نبيد محلي، أجبان، وأكل طيب بأجواء خرافية.

بتجربوا سوا كل أنواع النبيد مع سفرة مميزة على طاولة خشب ومناظر طبيعية ساحرة.

الرقم: 656 103 70

من الغابات للبحيرة، ومن الأكل الطيب للمغامرات، تعنايل فيها كل شي.

شوفوا كمان،مكتبة أنطوان فتحت كافيه ببيروت! شوفوا التفاصيل