مطعم خفيف ع الجيبة بيعمل سندويشات على اللبناني ولا أهضم!

رح نعرفكن اليوم على محل كتير مهضوم بتلاقوا بقلب بيروت على شارع صفير وبيعملكن أطيب سندويشات على اللبناني يعني متل إيام زمان: سندويش نصري.

ما في شي أطيب من سندويش الكفتة! الكبيس، البندورة، والمايونيز…ولا أطيب! بس شو معقول يكون الشي يلي أطيب من سندويش الكفتة؟

جربوا سندويش الفتايل يلي ملغومة بالطحينة أو كمان سندويش المقانق على اللبناني يلي بتجي المقانق فيها مدهونة مش قطع، أو سندويش السجق الروعة. فيكن تاخدوا سندويشاتكن بقلب خبز عادي أو حتى خبز فرنجي.

عندن كمان سندويشات دجاج مشوي، وسندويشات لسانات مع كبيس وتوم وحامض… يعني برجعكن لأكلات زمان. وعندن كمان شي مميز بيعملوا يلي هوي سندويش لحمة مع عسل ومايونيز وروكا بقلب خبزة محمصة.

هالمحل مش معروف كتير بس بيستاهل تجربوا خصوصي إذا زهقتوا من نفس المحلات وعبالكن شي سريع وخفيف على الجيبة.

للي بحب السندويشات ع اللبناني، ضروري تروحوا على سندويش نصري وتطلبوا السندويشات يلي بتعجبكن.

العنوان: شارع الصفير، بيروت
الرقم: 254 019 03

شوفوا كمان، أجدد وأغرب اختراع.. كبة فستق محشية قشطة!