بلّشت بزيتونة: شابة لبنانية عم تعمل تصاميم مستوحاة من الزيتون

كل شي بلّش بحبة زيتون، وبقصة حبّ مزروعة بتراب الضيعة! The Zeituna أو الزيتونة هي ماركة لبنانية محلية للموضة، بتجمع بين التراث الأصيل والتصميم العصري بطريقة ناعمة، بسيطة، ومليانة حب. كل شي بلّش مع المصمّمة تيا نجّار، يلي استوحت الفكرة من علاقتها الشخصية بشجرة الزيتون. 

قصة حبّ توارثت جيل عن جيل:

القصّة بلّشت من جدو قيصر، يلي من زمان كتير زرع زيتون بأرض الضيعة. ما كان يعرف وقتها إنو هالشجرة رح تكبر وتورّث مع الزيت شغف وحب كبير.

ومن هون خلقت الفكرة ببال تيا نجّار — مصمّمة لبنانية عندها شغف كبير بتراثها وهويّتها. كل شي بلّش من حبّها لشجرة الزيتون، يلّي بتمثّل الأرض، الجذور، والقصص اللي منكبر عليها.

تيا قرّرت تطلع شوي ع الضيعة وتروح تعيش بقلب جلال الزيتون… ببيت صغير وسط بستان بالطبيعة وحوّلته لمشغل أوatelier الخاص فيها. بس شهرين بقلب هيدا البيت وقت موسم الحواش، قدرت تيا ترجمن بكل إبداع بأول مجموعة شالات حرير من The Zeituna.

الزيتونة، تصاميم مغزولة من الأرض:

أول مجموعة هي عبارة عن شالات ناعمة وفخمة، بتتميز برسومات زيتون مرسومة بإيدها. كل قطعة متل اللوحة، أدق التفاصيل من الألوان ودرجاتها للرسومات يلي بتحكي قصة، كلو مستوحى من موسم تحويش الزيتون ومن الطبيعة بالضيعة. كل شال إلو طابع خاص، وكل قطعة معمولة بأجمل التفاصيل.

The Zeituna بتجمع بين البساطة والتميّز. التصميم هادي، رايق، وشيك، بجودة ونوعية عالية. إذا بتحبّي تلبسي شي ناعم، مميّز، وبيحمل معنى… The Zeituna معمولة إلك. فيكن تطلبوا أو تدعموهن ع حسابن هون. 

شوفوا كمان، من كسرة بلاطة ببيت جدو…شاب لبناني عم يرجع حرفة البلاط العتيق!