٤١ نكتة لبنانية ولا أبيخ من هيك!

في نكت بتسمعها وبتقول “شو هالبياخة!”، بس مع هيك بتضحكوا غصب عنكن! لأنو الضحك بضل أحلى دوا، جمعنالكن مجموعة من ٤١ نكتة لبنانية بايخة، بعضها قديم، بعضها جديد، وكلها على درجة عالية من السئالة وتقل الدم. جربوا تقروهن بدون ما تضحكوا… منتحداكن!

١. مرة واحد بخيل تجوز وحدة بخيلة جابو ولد حطوا بالقجة.

٢. مرة واحد بخيل راح يزور حدا ب المستشفى فشاف على الباب كلمة إدفع فقال أنا ببقى بزورو بالبيت أوفر.

٣. مرة فنجان قهوة طلق فنجانتو قام قالتلو طب والتفل يلي ببطني.

٤. في قنينة مي راحت تتمشى ليش؟ لأنها فاضية.

٥. مرة محامي رفع قضية وقعت عليه.

٦. واحد مسطول صاحبو وقع بالبير راح صار ينطرو عند الحنفية.

٧. واحد فرحان تجوز وحدة زعلانة خلفوا يا فرحة ما تمت.

.٨. ليش البرازيل ما بتزرع تين؟ لأنها دولة لاتينية

٩. مرة اتنين كفار، واحد تاب و التاني أي باد.

١٠. واحد قصير تجوز وحدة قصيرة خلفو ولد وقع عن السجادة.

١١. في واحد أكل صفوف قام تشردق تلاميذ.

١٢. في مسمار عمل رجيم قام صار دبوس.

١٣. في جزرتين عملوا مشكل صار مجزرة.

 ١٤. ليش الغبي أخد معو laptop على البحر؟ لحتى إذا شوب يفتح windows.

١٥. ليش الغبي بياخد معو مكنسة على البحر؟ لإذا ضربتو الشمس يضربها.

١٦. سئيل وسئيلة تجوزوا، جابو ولد عمل حالو ميت.

١٧. في واحد لف الكوع، أم أكلو.

١٨. مرة دبوس طلق مرتو ليش؟ لأنو عم تشك فيه.

١٩. مرة نانسي عجرم وقعت على الدرج قام قالت: اه ونص.

٢٠. مرة واحد لبس كلسات خضر، قام خضر لبسلو كلساتو.

٢١. مرة وحدة حبت تشطف بس تشطف ما حبا.

٢٢. في واحد شاف ساعتو واقفة، قام قلها تفضلي اقعدي.

٢٣. مرة كان في واحد دايق خلقو من الدني قام قرر يطلع على الفضا، قام صار مخنوق فضائي.

٢٤. قال في واحد عزم واحد على السطح، ليه؟ لأنن أصدقاء سطحيين.

٢٥. في وحدة إسمها سنا عملت دايت، قام صار إسمها ست اشهر.

٢٦. مرة فرشايي ضربت فرشايي تانية، قام قلتلها أنا بفرشيكي.

٢٧. قال مرة واحد مات، قاموا زعلوا عليه باقي الأرقام.

٢٨. مرة واحد بيشتغل ببنك تزحلق وقع على القرض.

٢٩. في مرة شامبو تجوز بلسم قام جابو بانتين وصبي.

٣٠. في سمكة تغالظت عرفيقتها السمكة، قالتلها: العمى ما أسمكك.

٣١. ليش اللمبة ما بتتجوز من عامود الكهربا؟ لأنو إبن شوارع.

٣٢. قال مرة سوبر ماركت عمل رجيم، قام صار بسطة.

٣٣. مرة واحد أكل رغيف كامل، قام كامل زعل.

٣٤. قال مرة واحد سأل وحدة شو إسمك، قالتلو روز وإنت؟ قام قلها برغل.

٣٥. قال محشش إجا صبي بعد ست بنات، قام سماه بكير.

٣٦َ. مرة واحد سأل وحدة شو إسمك؟ قالتلو هنادي أحمد. قام قلها ناديلو مين قلك إني خايف منو.

٣٧. ليش الشيطان ضعيف؟ لأنو الشيطان الرجيم بضل عامل رجيم.

٣٨. مرة واحد أكل سكين، انجرحت مشاعرو.

٣٩. شو بقولوا للبي لي عندو سبع ولاد؟ سفن أب.

٤٠. الأيام تمر، والأسبوع لبن.

٤١. مرة واحد قاعد بدفن، سألو رفيقو “إنت عزيت”، قام قلو “لاء أنا على مازوت”.

عجبكن هيدا المقال عن ٤١ نكتة لبنانية ولا أبيخ من هيك؟ شوفوا كمان، تعرفوا على زوجات أشهر لعيبة الباسكت بلبنان.