من السبعينات لليوم: أجمل المسلسلات اللبنانية يلي أثرت فينا!

من السبعينات لليوم، كانت المسلسلات اللبنانية جزء من حياتنا اليومية. كل عشر سنين كان في قصص جديدة، شخصيات صارت معروفة وحكايات بقيت بذاكرتنا. وعنجد طريقة كتابة المسلسلات اللبنانية تغيرت مع الوقت وحتى المجتمع تغير. بس نحنا بعدنا كل ما نشتاق لحقبة من الزمن منرجع لهل مسلسلات لأنها بتذكرنا بحالنا وبالقصص الحلوة والمرة يلي عشناها بهالفترات. تعو نرجع شوي بالزمن ونتذكر أهم المسلسلات اللي صنعت تاريخ التلفزيون اللبناني.

السبعينات: فترة الذكريات الجميلة

ألو حياتي

ما حدا بينسى هيدا المسلسل، خاصة العبارة الشهيرة: “ألو حياتي”. الثنائي الرومانسي هند أبي اللمع وعبد المجيد مجذوب كانو يسرقوا القلوب مع هالمسلسل اللي صار حديث الناس.

أبو سليم الطبل وفرقته

كوميديا كانت تضحك الكبار قبل الزغار، وكل حلقة كانت تخلي الناس ينسوا همومن. أبو سليم (صلاح تيزاني) كان النجم، وأسامي متل “سيارة الجمعية” و”كل يوم حكاية” حجزوا مكانن بذاكرة اللبنانيين.

عازف الليل

مسلسل رومانسي من 13 حلقة بس، بس كانوا يحكوا بالفصحى. هند وعبد المجيد كانوا رائعين، والموسيقى كانت تأليف الياس الرحباني اللي زادت من رومانسية العمل.

المشوار الطويل

شوشو وحسن علاء الدين قدموا دراما لبنانية بقلوب الناس. وردة وقعت بحب شريف النادل، والعلاقات العاطفية بمقهى شوشو صارت حديث الكل.

التمانينات: الجيل الذهبي

المعلمة والأستاذ

قصة حب بين معلمة وأستاذ، مش بس كانت تضحك، كمان كانت تعلمنا عن قضايا المجتمع وواقع التعليم بلبنان.

الدنيا هيك

مسلسل كوميدي كتبوا محمد شامل، وكل حلقة كانت مليانة أحداث مثيرة مع شخصيات حبيناها متل زمرد وعزيز وبلبل المزيكاتي.

أربع مجانين وبس

هيدا المسلسل كان بمثابة مدرسة كوميدية، من بطولة إيلي صنيفر وفيليب عقيقي، وكل حلقة كانت تخلينا نضحك ونحلل اللغز بنفس الوقت.

التسعينات: العودة للدراما

اكتبلي قصة

من المسلسلات اللي ما بتنسى، وكلما حكى حدا عن التسعينات، كانت كلمة “اكتبلي قصة” تترواح بين لسانات الجميع. كانت قصصو تمزج بين الخيال والواقع، وكل مشهد كان يعلق ببال اللبنانيين.

سكرتيرة بابا

بتدور الأحداث حول رجل بخون مرتو مع السكرتيرة، والمسلسل كان يسلط الضو على قصص عائلية مثيرة للضحك والدموع.

طالبين القرب

القصص العاطفية كانت تنبث على مدار أكتر من 100 حلقة، وكان يعتبر من أول المسلسلات اللي لقت نجاح كبير، مع أغانيه اللي لحد اليوم الناس بتغنيها.

العاصفة تهب مرتين

من أجمل المسلسلات اللي بعدنا منتذكرها، كان بطل المسلسل رجل أعمال محبوب من النساء، ولبنانيين كتير تعلقوا بقصتو اللي كانت صادمة.

الألفية: بداية عصر جديد

من أحلى بيوت راس بيروت

مسلسل من سنة 2001 إنشهر مع تيتر غنيتو الشهيرة “محظوظ كتير”، وكان يحكي عن مشاكل المراهقة والصعوبات اللي بيواجهوها الشباب بلبنان بين المدارس والجامعات.

مرتي وأنا

من أول حلقات هالمسلسل، ضحكنا مع فادي وكارين. كانوا يقدموا حياة “الزوجين الجداد” بأسلوب طريف وكوميدي، ولا أهضم.

خطايا صغيرة

مسلسل اجتماعي مشوق، اللي خلانا نعيش مع ساري وندور معو على الحقيقة، والأحداث كانت مليانة بالإثارة والتشويق.

سجينة

قصة مؤثرة عن سمر، اللي كانت تعيش حياة زوجية تعيسة، ولكن مع مرور الوقت وبفضل المحامي اللي ساعدها، تغيّرت حياتها وحبت من جديد.

فاميليا

مسلسل كوميدي ولكن في أحداث رومانسية، سلط الضو على علاقات الحب والتحديات اللي بتواجهها العيل بالمجتمع اللبناني وخصوصي شباب الجامعات.

ال 2010: قبل الإنتقال لعالم المنصات

حلوة وكذابة

داليدا بنت حلوة كتير بس كذابة كتير، مغرومة لشوشوتها بالفنان “رمزي ديب” من قبل ما تعرفوا حتى، يلي كمان كتير كذاب ومصاحب أكتر من بنت بنفس الوقت. بتخبر داليدا رمزي إنها غنية كتير وهي جاية من عيلة فقيرة، وبصير يحبها مع الوقت رغم كل كذباتها.

وأشرقت الشمس

مسلسل كسر الأرض وقت لي نزل وصار حديث الساعة، وما بقى حدا ما تعلق بالقصة وبالأبطال، “إيمي الصياح” و”يوسف الخال”. بيطغي علي الطابع التاريخي والأحداث الرومانسية، فبيحكي عن الصراع بين العرب والعثمانيين واستقلال العرب ولبنان عن الحكم العثماني.

الحب الحقيقي

مسلسل مستوحى من مسلسل مكسيكي قديم انعرض على محطة الLBC من زمان وحقق نجاح كبير بوقتها. بيحكي عن قصة نورا، البنت الرايقة والرومانسية الجايي من عيلة أرستقراطية ولي بتنغرم بشب مش من نفس المستوى.

قلبي دق

مسلسل أدخل “كارين” على الدراما اللبنانية من بابها الواسع، وبيحكي عن قصة حب بتجمع “تينا” و”سامي” وبأجواء كوميدية ورومانسية بنفس الوقت.

خبرونا، شو كان مسلسلكن المفضل؟

من السبعينات لليوم، هيدا هوي تاريخنا التلفزيوني، وإذا بطل موجود على الشاشة، فهوي بعدو موجود بذاكرتنا!

شوفوا كمان، أجمل تعليقات المشاهير ع تويتر على تمثيل سينتيا كرم!