ماستر نزّلوا تشيبس ع دجاج، شو القصة؟

عبالكن تشيبس ع دجاج؟ لا مش مزح، شركة ماستر اللبنانية قررت تخوض مغامرة جديدة وتقدّم نكهة الدجاج، يلي أكيد رح تخلق حشرية بين محبّي التشيبس والسناكات. تخايلوا قاعدين وعم تاكلوا تشيبس، بس بطعم تشيكن تندرز! 

مع إنو مش رح نصدق إلا لنشوف هالنكهة بالسوق لأنو ممكن تكون كذبة أول نيسان أو مجرد حركة تسويقية مهضومة، أو عنجد ممكن نزّلوا تشيبس ع دجاج! شو رأيكن؟ بتجربوها؟

شركة ماستر اللبنانية هي ماركة محلية للتشيبس قدرت تنافس وتثبت حالها بالسوق اللبناني وحتى برا. تأسست من أكتر من ٦٠ سنة، ومن وقتها وهي عم تقدّم نكهات بتجمع بين الجودة والطعم الأصيل يلي بيحبو اللبناني.

بلّشت ماستر بنكهات تقليدية كتير محبوبة متل الملح، الخل، كاتشاب، الجبنة، الباربكيو، الفلفل الحر. 

مع سنين وسّعت خياراتها لتشمل نكهات مبتكرة متل ترافل، والليمون والفلفل، جبنة البارميزان، هاني مسترد، وحتى اللبنة. ودايمًا كانوا يحرصوا إنو يستعملوا أفضل أنواع البطاطا الطبيعية، ليعطوا تجربة قرمشة منحبها من طفولتنا.

إذا كنتوا من عشّاق النكهات الجديدة، يمكن هلّق صار وقتكن تجرّبوا التشيبس بنكهة الدجاج من ماستر وتحكموا بنفسكن. مين بيعرف، ممكن تصير نكهتكن المفضلة الجديدة!

شوفوا كمان، بلبلة واسعة بعد إعلان ليبتون الكاذب عن سحب شاي الخوخ!