ليش إسمها كاسليك؟ الحقيقة ورا الإسم اللي كلنا منعرفو وما منعرفو!

إذا كنتو مارقين بالكاسليك، أكيد سألتو حالكن: “شو أصل هيدا الاسم؟” وكتار منا بيسمعوا الإسم بدون ما يعرفوا قصتو الحقيقية. المنطقة مشهورة بجامعتها، بمطاعمها، وبإطلالتها الحلوة عالبحر، بس ورا هالاسم قصة قديمة رجعتنا سنين لورا.

^{Credits: أرشيف لبنان Lebanon Archive}

الكاسليك جزء من قضاء كسروان بمحافظة جبل لبنان، وكانت مليانة بيوت حجر قديمة بترجع للقرن الـ18، وكنايس عريقة بعدها بتشهد عالتاريخ. ومع الوقت، كبرت المنطقة وصار فيها مصانع، جامعات، ومشاريع حديثة، وصارت من أهم المناطق النابضة بالحياة.

^{_{Credits: saaih}}

هلق شو قصة الإسم؟ الرواية الأولى بتقول إنو من زمان، كان موجود بهالمنطقة دير المخلص للرهبان الحلبيين الكاثوليك، وهالشي خلا العالم يربطوا المكان باسمهن. ومع الوقت، كلمة “كاثوليك” تحوّلت باللفظ عند الناس وصارت “كاسليك”، وهيك صار الإسم المتعارف عليه! هيدا الدير كان مركز روحي وثقافي مهم، وكان يجذب ناس من كل المناطق.

ومن وقتها، الإسم بقي متل ما هوي، وصارت الكاسليك منطقة بتجمع بين التاريخ والحداثة، وبين الروحانية والحياة اليومية النابضة بالحركة.

في رواية تانية بتقول إنو الاسم مرتبط بحدث صار سنة 1840. بهيدي السنة، البحرية البريطانية نزلت بمنطقة جونية 1500 جندي عثماني وبريطاني ليواجهوا إبراهيم باشا. وقتها، القوات استخدمت مبنى عسكري قديم كثكنة أو “قشلة”، وهاي الكلمة التركية اللي كانت تستعمل للثكنات العسكرية أو أماكن إقامة العسكر. مع الوقت، اسم “قشلة” تحول باللفظ الشعبي وصار “كاسليك”، وصارت المنطقة معروفي بهيدا الاسم!

^{Credits: أرشيف لبنان Lebanon Archive}

اليوم، الكاسليك أشهر من أن تعرف، معروفي بكل شي فيها، من الجامعة العريقة، للمطاعم اللي على البحر، للحياة الليلية اللي بتخليها وحدة من أروع المناطق اللبنانية. بس مع كل هالتطور، إسمها بقي حامل قصة من الماضي، قصة كانت يمكن رح تنتسى لو ما نحنا عم منحكي فيها هلق.

وهلق، بعد ما عرفتو القصة، شو رأيكن؟ كنتوا بتعرفوا أصل الاسم، أو أول مرة بتسمعوا بهالتفاصيل؟

شوفوا كمان، ليش إسم المنطقة فرن الشباك وشو علاقتها بكعك رمضان؟