بلبلة واسعة بعد إعلان ليبتون الكاذب عن سحب شاي الخوخ!

بخطوة صدمت كتير من الناس، ليبتون أعلن عن توقيف نكهة الشاي المتلج بالخوخ. الخبر نزّلوه على صفحتن ع إنستغرام بمنشور مهضوم ومحزن بنفس الوقت بعنوان “Rest in Peach”، مع صورة للعلبة الشهيرة. وبرغم إنو ليبتون طمّن العالم إنو باقي النكهات بعدها موجودة وترك الباب مفتوح لرجعة محتملة. الإعلان خلق موجة إحباط واستغراب عالسوشيال ميديا.

هالبوست ما مرق ع خير، بس طمّن العالم إنو “كل النكهات اللي بتحبوها بعدها هون لتبرّدوا قلبكن.” التعليقات كلها كانت عبارة عن صدمة! كيف شركة Lipton Iced Tea بتسحب منتجها الأكتر مبيعاً بالسوق؟ في تعليق شبّه الخبرية كأنو كوكاكولا بطّلت تبيع كولا مثلاً، وواحد تاني تساءل كيف الشركة بتشيل “يمكن أنجح نكهة عندها!” وغيرن طلبوا من شركة ليبتون يغيرو رأيكن ويشيلوا البوست.  

من بعدها بساعات، ليبتون وضّح إنو كل هالقصة كانت بس مزحة ويمكن نكتة أول نيسان مبكرة شوي. العالم ما أخدت هيدي الحركة الإعلامية بروح رياضية، خاصةً إنو في ناس نزلت وخزّنت شاي ليبتون متلج بالخوخ عن سنة!

ممكن تكون هالحركة مزيج من عدة أهداف! يمكن ليبتون كان بدّه يزيد المبيعات، خصوصي إنو الناس ركضوا يخزّنوا الشاي قبل ما يختفي، أو يمكن الهدف كان جذب الانتباه الإعلامي، ومن هالناحية نجح لأن الكل صار يحكي عنه! 

ممكن كمان يكونوا عم يروّجوا للمشروب بطريقة جديدة، أو حتى يمهّدوا لتغيير أو إصدار خاص من هيدي النكهة المحبوبة. شو رأيكن؟ هيدي كانت حركة إعلامية ذكية ولا بس جذب إنتباه ع الفاضي؟

 شوفوا كمان، إعلان عيد الأم لمجوهرات زغيب عمل بلبلة ع تيك توك!