فروج الأشقر: محل فروج بيتوتي ببرمانا

إذا مرقتوا ببرمانا وما وقفتوا عند “فروج الأشقر“، بتكونوا عم تروحوا على حالكن لقمة بتجنن! هالمحل عالطريق الخارجية لبرمانا، وكل اللي بيعرفوا بيعرفوا إنو واحد من أطيب المحلات يلي بتقدم سندويشات الفروج والمشاوي بالبلد.

تحت اليافطة الحمرا، المحل مقسوم لقسمين: عاليمين في قسم العصير الفريش، وعالشمال قسم والسندويشات. بس أهم شي؟ زاوية الفروج المشوي عند المدخل، وهون السحر الحقيقي!

سندويش الفروج هون غير شكل! خبز مرقوق سخن وطازة، مليان دجاج طري ولونو أبيض، مع أطيب توم معقول تدوقوا، بطاطا مقرمشة بيتوتية، وكبيس بيعطيها طعمة مميزة. مش عبث صار هالمحل أسطورة بكل معنى الكلمة!

“الأشقر” معروف إنو عندو طعمة الفروج المشوي يلي ما بتلاقوها بمحل تاني! مشوي عالفحم، متبل بطريقة بتخليكن تدمنوا علي، ومعو صوص التوم اللي ولا أطيب من هيك. هيدا المحل عمرو 35 سنة من 1990 وبعدو محافظ على طابعو التقليدي. نفس الطعمة، نفس الجودة، ونفس الإتقان يلي خلا من أهم المحلات بالمنطقة!

المحل مش بس للفروج، في عندن كمان كل أنواع المشاوي عالفحم، بتتبيلات خرافية، لكل اللي بيحبوا المشاوي والسندويشات اللي بتشبع بنفس الوقت. وشو كمان؟ عندن برغر على اللبناني.

إذا جربتوا السندويش، لازم تدوقوا الفروج المشوي يلي بينحط بتاخدوا مع بطاطا مقرمشة، توم، وكبيس، لتكون الوجبة متكاملة ولذيذة.

ما تنسوا المفاجأة الأخيرة، العصير الفريش! بعد وجبة تقيلة ولذيذة، بتختموها بكاسة عصير طازة بتنعشكن، وبتخليكن تحسوا حالكن بالصيفية! عبالكن عصير تفاح، ليمون، رمان، أناناس أو حتى جزر؟ كل شي موجود وطازة.

باختصار، “فروج الأشقر” مش بس محل فروج، هوي تجربة لازم تعيشوها، وخصوصي إذا كنتوا مارقين ببرمانا!

العنوان: برمانا
الرقم: 443 862 24

شوفوا كمان، مازة لبنانية صيامية ب25$ عند أطيب مطعم لبناني.