شوفوا أيا شخصية من مسلسل القدر بتشبهكن أكتر شي!

مسلسل “القدر” شد العالم بقصتو يلي كلها دراما، حب، وصراعات عائلية، وبيحكي عن كيف الطموح والقرارات المصيرية بيغيروا حياة الشخصيات. كل شخصية عندها طريقتها بالتعامل مع الحياة، وهيدا الشي خلا الناس ينقسموا بين يلي حبوا شخصيات معينة ويلي اعتبروها مستفزة أو مش مبررة. بس مسلسل القدر مش بس للمتابعة، هوي كمان خلا كل واحد منا يسأل حالو: “أنا بشبه مين بهالقصة؟”. ومع كل حلقة، النقاشات كانت تزيد، وكل قرار صار حديث السوشال ميديا، لدرجة إنو كل شخصية صار إلها فانز وناس بتدافع عنها!

النقاشات ما خلصت، وكل واحد منا صار عندو شخصية مفضلة، يمكن لأنو حس حالو فيها أو تأثر بتصرفاتها. في شخصيات محبوبة من الكل، وفي يلي أثاروا الجدل. بس بالحقيقة، كل شخصية عندها شي بيشبهنا بطريقة أو بأخرى. فخلونا نكتشف سوا مين أكتر شخصية بتشبهكن بين نجوم مسلسل “القدر”!

١. زيد (قصي خولي) – القائد الواثق

زيد هو الشب الرايق، الجنتلمان، المرتب يلي بيعرف شو بدو من الحياة. عندو طموح كبير، ذكي، وناجح بشغلو. بالرغم من إنو مرتاح مادياً، ما بيتكبر ولا بيتفاخر، بل بالعكس شخص متواضع وقلبو طيب. ما بيتقبل الكذب، وبيقدس الصدق والاحترام. إذا كنت شخص بيحط شغلو وعيلتو أولية، ما بتحب الكذب، وعندك كاريزما بتخلي الكل يرتاح معك، فإنت نسخة عن زيد!

٢. نور (رزان جمال) – العاشقة الوفية

نور بنت بسيطة بس بثقة عالية بحالها، بتعرف شو بدها، وقلبها مليان حب. بالرغم من إنو جايي من عيلة متواضعة، قدرت تفرض حالها بشخصيتها الحلوة. بتحب من قلبها ومستعدة تضحي بكل شي كرمال الناس لي بتحبن، حتى لو على حساب راحتها. إذا كنت شخص طيب، بتعطي بدون مقابل، وبتحط سعادة لي بتحبن قبل سعادتك، فإنت نور بحد ذاتها!

٣. تالا (ديما قندلفت) – الطموحة القوية

تالا مرأة ناجحة، قوية، وواثقة من حالها. حبها لجوزها كبير، بس عندها أنانية أوقات بتخليها تحط مصلحتها قبل أي شي. ما بتقبل تفشل، وما عندها مشكلة تاخد قرارات صعبة لتحقق أهدافها. إذا كنت شخص مستقل، عندك شخصية قوية، وما بتخلي شي يوقف بطريقك حتى لو انحسب عليك أنانية، فإنت تالا!

٤. إياد (ميلاد يوسف) – الطيب الضايع

إياد شخص طيب، قلبو كبير وبيحب مرتو وعيلتو من كل قلبو. بس مشكلتو إنو أوقات ما بيعرف يتصرف، بياخد قرارات غلط، وبيخلي الأمور تفلت من إيدو. مش شخص سيء، بس بحاجة ليركز أكتر. إذا كنت شخص بتحب عيلتك، عندك نوايا طيبة، بس أوقات بتخبص وما بتعرف كيف تتصرف وتاخد القرار الصح، فإنت بتشبه إياد.

٥. الست نجوى (رندة كعدي) – الحما القوية

الست نجوى هي الإم يلي بتمسك العيلة بإيدها، كلمتها مسموعة وقرارها حاسم. بتحب ولادها بس بطريقتها، وبتحب كل شي يكون تحت سيطرتها. مسؤولة، عقلانية، وما عندها صبر للغلط. إذا كنت شخص بيحب يكون صاحب القرار، عندك خبرة بالحياة، وما بتوثق بسهولة بحدا، فإنت متل الست نجوى.

٦. هدى (مارينال سركيس) – الضحية القوية

هدى شخصية كتير طيبة، بتحب ولادها وبتتحمل كل شي كرمالن. بس عندها مشكلة إنو ما بتحط حدود للناس وبتحاول ترضي الكل، لحد ما تتراكم عليها الأمور وتنفجر وهيك صار مع جوزها. إذا كنت شخص مسالم، بتسكت وبتتحمل، لحديت ما تحس حالك انظلمت زيادة عن اللزوم بتجن وبتنفجر وما بتعود مسيطر على حالك، فإنت متل هدى.

٧. تيم (فارس ياغي) – العاشق الأعمى والساذج

تيم حب نور بكل ما في، حتى لو ما حبتو بنفس الطريقة. شخص بيحب بصدق، مستعد يضحي بكل شي كرمال يلي بحبن، حتى لو كان هيدا الشي ضد مصلحتو. إذا كنت شخص بتحب من كل قلبك، وما عندك مانع تضحي وتتنازل بس تكون مع الشخص يلي بتحبو حتى لو ع حساب عقلك لدرجة إنو تكون ساذج، فإنت بتشبه تيم.

٨. رندا (رانيا سلوان) – قلبها طيب والدني مش سايعتها

رندا شخصيتها فرحانة، مهضومة، بتوزع طاقة إيجابية وين ما كانت. بتسامح بسرعة حتى لما يغلطوا بحقها وما بتحقد، بس أكيد بتحب تفتعل المشاكل بين الكل. إذا كنت شخص عطول بتضحك، قلبك كبير، وكمان بتحب الدراما…فإنت متل رندا.

وهلق، خبرونا، مين أكتر شخصية حسيتوها بتشبهكن؟

شوفوا كمان، ٥ مشاهير لبنانيين تزوجوا المعجبين تبعن… قصص حب خيالية!