٦ جواهر مخباية بتلاقوها بزواريب ببيروت

نحنا عايشين كرمال الجواهر المخباية ببيروت، وإذا ما زرتوا هالـ6 جواهر الموجودين بزورايب بيروت، صار لازم تحطوهن على لائحة مشاويركن.

١. الست نايلا، مار مخايل

بقلب The Pink House، بآخر زاروبة بمار مخايل، في محلّ فني بيجمع كل الناس اللي بيحبوا القطع القديمة والفن. هون فيكن تلاقوا إشيا مميزة خلال سوق السبت الأسبوعي، وتتعرفوا على عالم جداد عندن نفس الشغف تبعكن.

كل فترة وفترة، بيعملوا سهرات موسيقية، فإذا كنتو من محبي الجاز وكاس نبيد، ما تفكروا مرتين، وخدو الشريك لعند الستّ نايلا لتعيشوا ليلة مميزة.

لتلاقوا موقع هيدا المحل، اضغطوا هون.

٢. RM، الحمرا

كافي مخبى للناس اللي بتحب الأجواء الرايقة والقعدة المريحة. RM يمكن ما تلاحظوا جمالو من أول نظرة، بس إذا فتتو علي، رح يصير من الأماكن المفضلة عندكن!

القعدة دافية، الديكور بعقد، والقهوة… من عالم تاني. بس المفاجأة؟ عندن كنافة نابلسية بتشهي! المكان بتديرو ست أردنية-لبنانية حافظت عوصفات عيلتها وقدمتها بطريقة كلاسيكية.

إذا ما بتحبوا الأماكن المزدحمة وبتفضلوا تقروا كتابكن عالهدا مع فنجان قهوة، هيدا المحل إلكن.

لتلاقوا موقع هيدا المحل، اضغطوا هون.

٣. رصيف،, الحمرا

وجكن بوجه RM، يعني مش بحاجة تبرمو كتير لتلاقوا! إذا عم بتدورو على محل بحسسكن إنكن ببيتكن التاني، “رصيف” رح يعجبكن. القعدة دافية، الأكل طيب، وكل شي هون بيذكركن بأكلات البيت.

بتقدروا تتروقوا أو تتغدوا بأجواء رايقة، وإذا ما كنتو بمود المازة اللبنانية، عندن كمان طبخات متل شوربة مشروم، شيش برك، وكفتة وبطاطا.

بالليل، القعدة بتصير أحلى مع الإضاءة الخفيفة، كاس بيرة، وضحك من القلب مع الأصحاب.

لتلاقوا موقع هيدا المحل، اضغطوا هون.

٤. درج، مار مخايل

المحلّ اللي بيغير مودكن على الآخر! درج هوي جوهرة مخفية بمار مخايل، وحيصير بسرعة واحد من الأماكن السرية المفضلين عندكن، ومش بس لأنو فيكن تجيبوا حيوانكن الأليف!

عندن قعدة برا بتعطي طاقة إيجابية من ورا الألوان الفرحة، وجوا الديكور مريح للعين والبال. القهوة طيبة، والطاقم كتير لطيف، والمينيو في دايماً شي جديد.

أحلى شي؟ عندن ترويقة كل النهار، وإذا طولتو قعدتكن، بيضيفوكن كوكتيل!

لتلاقوا موقع هيدا المحل، اضغطوا هون.

٥. أباجور، العدلية

إذا بتحبوا المحلات اللي فيها جنينات وأجواء فنية، لازم تحطو أباجور عالليستا.

هيدا البيت القديم اللي تحول لمقهى ومطعم وملتقى ثقافي هوي من أجمل الزواريب ببيروت. إذا بتحبوا موسيقى الجاز والموسيقى الحية، جربوا تحجزو ليلة من لياليهن الموسيقية وتعيشوا أجواء ساحرة مع أكل لبناني طيب بلمسة عصرية.

لتلاقوا موقع هيدا المحل، اضغطوا هون.

٦. رواق، الجعيتاوي

إذا بدكنن محل بيجمع الكتب والموسيقى، فـ”رواق” هوي المكان المثالي!

فيكن تستمتعوا بصبحيات بيروت العفوية، تلقمشوا لقمات شهية، أو تشربوا المشروبات اللي بتحبوها وكل هيدا وإنتو عايشين أجواء الدردشة الخفيفة مع ناس بيشبهوكن وبيحبوا يقضوا وقتن برواق. 

الصبح، القعدة رايقة وبتقدروا تشتغلوا أو تشربوا قهوتكن وتراقبوا الناس. بالليل، في live DJ أوقات، أو open mic للناس اللي بتحب تضحك على stand-up comedy.

لتلاقوا موقع هيدا المحل، اضغطوا هون.

تأكدوا تتصفحوا قسم #الجواهر المخفية على موقعنا للمزيد!