ليش إسم المنطقة نهر الكلب؟ صار لازم تعرفوا قصتها!

منطقة نهر الكلب مش بس مكان طبيعي، هي كمان مكان بيحمل قصة كبيرة عن تاريخ لبنان. إسم نهر الكلب مثير للفضول، وأكيد في كتير ناس بتسأل عن السبب. خلونا نخبركن شوي عن هيدا المكان الغني بالآثار والأساطير.

من وين إجت تسمية نهر الكلب؟

الموقع مش سهل إنو يمرق علي الناس، لهيك صار عندو إسم غريب. أما بالنسبة لإسم “نهر الكلب”، في عندكن أكتر من رواية. قبل، كانو الإغريق والرومان يسموا “نهر الذئب”، والسبب؟ في أسطورة بتحكي إنو بقلب الوادي كان في كلب ضخم وعنيف، تعوايتو كانت تخوف كل الناس اللي بيمرقوا من هالطريق. كانت وظيفتو إنو ينبه أهل المنطقة عن وصول الأعداء. و”التعواية” كان عندها صدى قوي، فالرواية الأولى بتقول من هون إجا الإسم..

^{Credits: IML Lebanon}

أما الرواية التانية بتقول إنو كان في تمثال منحوت على شكل كلب موجود أعلى الجبل بيشرف على البحر والطريق. وبتقول الخبرية إنو لما اجتاحوا العثمانيين المنطقة قطعوا راس التمثال وكبوا بالبحر، وضل يظهر ويبين بالمي وقت كانت تكون المي صافية ورايقة!

وادي نهر الكلب كان معروف بتضاريسو الصعبة. الجبال العالية كانت تمنع مرور أي جيش بسهولة، وكانوا يضطروا يشقوا طريق ضيق بين الصخور ليوصلوا لهالمكان. لهيك، الناس اللي مرقوا من هون، تركوا نقوش على الصخور تخلد هالتجربة.

المنطقة مليانة بأنصاب وآثار مهمة. في أكتر من 20 صخرة منحوتة بتوثق تاريخ شعوب مرقت على لبنان. فيكن تشوفوا كتابات بلغات قديمة متل الهيروغليفية، الآشورية، البابلية، اليونانية، والرومانية. هالآثار بتوثق أحداث كبيرة بتاريخ لبنان من آلاف السنين.

^{Credits: lebanonism}

وحدة من أبرز النقوش هيي لوحة بتخلد جلاء الجيوش الأجنبية عن لبنان سنة 1946، واللي كانت بمشاركة الشيخ بشارة الخوري. هيدا النقش بيشكل علامة فارقة بتاريخ لبنان.

وعلى مر العصور، عبرت شعوب كتير من هالمكان وتركوا وراهن آثار ونقوش. من الفراعنة لحد الجيوش الفرنسية، كل واحد ترك بصمة بتوثق مرحلة من مراحل تاريخ لبنان. مثلا، في عندكن نقوش من عهد الملك نبوخذ نصر، الملك رعمسيس الثاني، والإمبراطور ماركوس أوريليوس.

متحف مفتوح على الطبيعة

وإذا زرتوا المنطقة اليوم، مش بس بتشوفوا هالأنصاب، كمان فيكن تشوفوا جسر قديم من أيام العهد المملوكي، وبيوجهكن الجسر نحو الصخور. هالمنطقة عبارة عن متحف مفتوح، بتجمع بين التاريخ، الأساطير، والجمال الطبيعي.

بعد ما تطلعوا من وادي نهر الكلب، رح تشوفوا المناظر الحلوة للبحر وبيروت من فوق الجبال. هيدا المكان مش بس شاهد على تاريخ لبنان، هوي كمان مثال على كيف هالمنطقة كانت نقطة استراتيجية وحيوية عبر العصور.

شوفوا كمان، بتعرفوا إنو أكبر منتجع تزلج بالشرق الأوسط موجود بلبنان؟