بتعرفوا إنو أكبر منتجع تزلج بالشرق الأوسط موجود بلبنان؟

لما نفكر بأكبر منتجع تزلج بالشرق الأوسط، الجواب واضح: المزار كفردبيان. هالمكان مش بس الأكبر، هو الوجهة الأولى لعشاق التزلج، بمساراتو الممتدة على 80 كيلومتر وارتفاع بيوصل لـ 2465 متر. تخايلوا إنكن بس بساعة وحدة من بيروت بتكونو وسط جبال مغطاية بالتلج!

القصة بلشت بالستينات، وقت قرر سامي جمال وإميل رياشي، مع مجموعة شباب شغوفين، يحولوا جبال لبنان لوجهة تزلج بتضاهي المنتجعات العالمية. بأول خطوة، جابوا مصعد تزلج من سويسرا، وحطوا بتلة “الملجأ”، وبنوا أول شاليهات. بعدها، توسع المشروع بشكل هائل، وبـ 1965 فتح فندق مزار، وصار نقطة بتجمع كل اللي بيحبوا التزلج. لما ركبوا أول تلفريك، سهلوا الوصول بين التلال، وصارت التجربة أمتع وأكبر.

^{Credits: Mzaar Ski Resort}

لكن طريق النجاح ما كانت سهلة. الحرب الأهلية عطلت كل شي بالـ 1975، بس المنتجع ما وقف، وبعد الحرب، رجع أقوى. بالـ 1993، استلمت مجموعة استثمارية سعودية المشروع ووسعتو بشكل ضخم، ليوصل اليوم لواحد من أهم منتجعات التزلج بالمنطقة، بمرافق حديثة وتجربة ولا أروع.

^{Credits: Mzaar Ski Resort}

وليش إسمو “المزار”؟ لأنو قاعد على أعلى قمة في، جبل المزار، يلي كان من زمان موقع لمعبد روماني قديم. الرومان كانوا يستعملوا لإرسال إشارات نارية بين الساحل وبعلبك. يعني هالمكان عندو تاريخ ممتد من آلاف السنين!

اليوم، المزار هو أكتر من مجرد منتجع تزلج. إذا كنتو محترفين أو عم تجربوا التزلج لأول مرة، في مسارات متنوعة لكل المستويات. وحتى إذا مش كتير بتعرفوا تعملوا السكي الكلاسيكي أو ما بيعنيلكن، التجربة هون بتشمل السكي دو، السنو بورد، التزلج الليلي، والعروض الحماسية. وأكيد، بعد نهار طويل، فيكن تستمتعوا بسهرة دافية بشاليه أو بحفلة تحت التلج.

اليوم، المزار مش بس منتجع، هوي تجربة متكاملة لكل عشاق التزلج والمغامرة. من المنحدرات اللي بتناسب الكل، للمشهد اللي بيخطف الأنفاس، وللأجواء اللي ما بتشبه غيرها… هيدا المكان صار رمز للشتوية بلبنان.

شوفوا كمان، أول ظهور لهيفا على الشاشة: بفيديو مع سلطان الطرب سنة 1996.