ضيعة شمالية فيها عجايب وغرايب مش سامعين فيها!

في ضيعة بالشمال، ما بتسمعوا عنها كل يوم، بس فيها عجايب وغرايب بتخليكن توقفوا وتقولوا: “عنجد هيدي بلبنان؟” إسمها حردين، وبمجرد ما تفوتو عليها بتحسو كأنكن رجعتو بالزمن لورا. الطرقات ضيقة، البيوت حجر بقرميد أحمر، الكنايس والأديرة عمرها ميات السنين، والطبيعة بتحاوطكن من كل الجهات. بس في شي واحد بيشدكن أكتر: الصخرة العجيبة يلي ميلة كأنها بدها توقع، بس صامدة من آلاف السنين، كأنها متحدية الجاذبية!

^{Credits: Live Love Hardine}

كنوز مخباية بين التلال

أول ما توصلوا، بتبلشو تشوفوا كهوف مخباية بين التلال، وخراب من العصر الروماني والصليبي، كأنها عم تخبركن قصص من زمانات بعيدة. بس أهم شي بميز حردين عن غيرها هوي هالصخرة العجيبة يلي بتمرق بوسط الضيعة، وبتعطيها هالشكل الغريب كأنها لوحة فنية ربانية.

^{Credits: Live Love Hardine}

أول ما تبلشوا تمشو، بتحسوا كأنكن دخلتو عالم تاني. من جهة عندكن المعبد الروماني، بقايا قديمة بحجار ضخمة وأعمدة شامخة، من النوع النادر بالنمط الأيوني، كأنو شي من فيلم تاريخي. ومن الجهة التانية، بتلاقو كهوف مخباية بين الصخور، بعضها كان مساكن للرهبان من زمان، وبعضها بعدو غامض ما حدا بيعرف شو قصتو.

^{Credits: Live Love Hardine}

ولعشاق التاريخ، حردين هيي أول ضيعة عرفت المسيحية بلبنان، وفيها أكتر من ٣٠ كنيسة ودير قديم. ومن هون، طلع القديس نعمة الله الحرديني، يلي بيتو بعدو موجود وبتقدرو تزوروا. هون بتحسوا كأنكن بفيلم تاريخي، كل زاوية فيها قصة، وكل حجر فيها حامل سر من الماضي، بذكركن إنو هالضيعة قديمة قدم الزمن.

^{Credits: Live Love Hardine}

رحلة للمشي بين السما والأرض

إذا كنتو من محبي المشي بالجبال، حردين عندها دروب بتخليكن تحسوا كأنكن طايرين فوق لبنان. جبل حردين بيوصلكن لعلو ١٧٠٠ متر، والمشهد من فوق خرافي: بتشوفوا البترون، الكورة، بشري، وإذا كان الطقس صافي، بتلمحو بيروت وسوريا وحتى سواحل قبرص!

^{Credits: Live Love Hardine}

ما تنسو تمشو عالبلاطة الشهيرة، يلي هيي صخرة ضخمة طولها ٣٥٠ متر وعمرها ملايين السنين، ومليانة أحافير بحرية من أيام الديناصورات! وبتتخيلو كيف الزلازل والصخور شكلوا جبل لبنان من وقتا.

^{Credits: Live Love Hardine}

بس هون في شغلة لازم تنتبهولها: بعض المناطق بعد فيها ألغام من الحرب، فديرو بالكن وين عم تمشي واسألو أهل الضيعة عن الدروب الآمنة.

^{Credits: Live Love Hardine}

طبيعة بتاخد العقل

غير المناظر والآثار، حردين فيها سحر خاص بفصول السنة. بالصيف، الهوا بارد منعش. بالشتا، الشتي بيغرق الأرض الطينية وبتتحول الطرقات لمسطحات مائية زغيرة، كأنكن واقفين على مراية بتعكس السما. أما بالربيع، الضيعة بتتحول لبساط أخضر مليان ورد وشجر.

^{Credits: Live Love Hardine}

واللي بيميز حردين بالخريف هوي شجر السفرجل، يلي مع كل أول شتوية بيصير موسمو، وأهل الضيعة بيعملوا منو مربى سفرجل ولا أطيب، لازم تدوقو إذا زرتو المنطقة!

وين بتاكلو بعد هالمغامرة؟

أكيد بعد كل هالمشي والاستكشاف، رح تجوعوا! بس هون عندكن خيار إنكن تعيشو التجربة اللبنانية الأصيلة. أقرب مطرح للأكل هو ديوان الحسون، مطعم لبناني عالطريقة التقليدية بالضيعة المجاورة. بتفوتو علي وبتشمو ريحة المناقيش عالصاج، واللحمة بعجين، والمازة اللبنانية يلي ما بتخلص. قعدة رايقة، ومنظر حلو، وأكل طيب بينهي يومكن بأحلى طريقة.

الرقم: 039 080 70

وين فيكن تناموا بحردين؟

إذا قررتو تكملوا مغامرتكن وتناموا بهالضيعة الساحرة، ما في خيار أحلى من Hardine Treehouse! هالبيت المعلق بين الشجر هو الملجأ المثالي لكل حدا بدو يهرب من ضجة الحياة ويرتاح بصوت الطبيعة. الديكور بيجمع بين البساطة الريفية والراحة العصرية، والمشهد من التريهاوس؟ من الأحلام! رح تحسوا حالكن بعالم تاني، فوق الغيوم، وسط أحضان الطبيعة، بعيد عن كل شي إلا عن الهدوء والمغامرة.

ليش لازم تزوروا حردين؟

حردين مش بس ضيعة، هي تاريخ مخبى بين الجبال، طبيعة بتشرح القلب، وقصص من الماضي بعدنا لليوم عم نكتشفها.

^{Credits: Live Love Hardine}

وإذا كنتو من الأشخاص يلي بحبوا المغامرات، المناظر الخرافية، والتاريخ الغامض، فهيدي الضيعة لازم تزوروها!

شوفوا كمان، ذكريات الطفولة اللبنانية: عشبة الحميضة!