هالفرن بالنبطية عندو أطيب منقوشة جريش جنوبية!

بقلب ضيعة كفررمان بالنبطية، المشهورة ببيوتها القديمة وسهلها الأخضر، بتلاقوا فرن تراثي عابق بريحة المناقيش، ومش بس أي مناقيش – منقوشة جريش جنوبية! “جريش زبيب“، هيدا الفرن مش مجرد فرن، هو قطعة من تراث المنطقة، حافظ على أسرار الطعمة الأصيلة يلي بتاخدك بلفة ع الزمن الجميل ونكهات الجنوب.

شو هو مشطاح الجريش أو منقوشة الجريش بالجنوب؟

المشاطيح بجريش، أو ما يعرف بالضيع بال “بعابيق بالجريش” خبز الجنوبيين وجزء من تراث جبل عامل من أكتر من ٤٠٠ سنة. وخبز المشطاح التقليدي معروف بكل أنحاء لبنان! بس اللي بميزو بالجنوب انو معمول من قمح الجريش يعني القمح البلدي المجروش أو المطحون ع الخشن مع السمسم وحبة البركة. ووصفتو آخدينا عن جدودنا وبتلاقوا وين ما كان بأفران الجنوب. ريحتو لحالها بتاخد العقل! فيكن تتعرفوا على هيدي الأكلة أكتر بمقالنا هون.

جريش زبيب، أطيب منقوشة جريش بإنتظاركن!

هيدا الفرن حافظ على الأصالة، من طريقة العجن والتخمير، لخبز المناقيش، كأنكن عم تاكلوا من إيدان ستّكن. ريحة المناقيش بتعبّي الحي، والزبونات بيجوا من كل المناطق ليدوقوا هالنكهة يلي بتحمل حنين الطفولة والترويقة مع العيلة.

منقوشة الجريش يلي بيعملها مثالية، بتفوت عالفرن لتاخد قرمشة من تحت وطراوة من فوق، وتعطيك طعمة ما بتشبه شي غيرها. وفي منّا كتير نكهات، ومش بس هيك بتلاقوا مناقيش ع أنواع مختلفة، كعك العباس، وكرواسون وقصص طيبة للترويقة.

إذا مرقت بالنبطية، ما فيكن تفوّت هالمنقوشة! كدشة منها كفيلة ترجعكن لأيام الضيعة، أيام الخير والبساطة، لأن بكل لقمة في حكاية جنوبية طيبة.

بتلاقوا جريش زبيب بكفررمان مقابل ثانوية البنات الرسمية، وفيكن تابعوهن هون.
للتواصل ع الرقم: 283 828 71.

شوفوا كمان، صار فيكن تجربوا ترند البطيخ بالحلوم بهيدا المحل ببيروت!