٤ محلات بتعمل أطيب سندويشة فتايل بلبنان

إذا كنتوا من عشاق سندويشات الفتايل، هالمقال لإلكن! بهالبلد، في مطارح بتبرع بتحضير هالسندويشة بطريقة بتخليها ما بتنتسى. من أول لقمة، اللحمة الطرية، التتبيلة، والطعم الدسم بيفرجوكن ليه الفتايل من أطيب السندويشات بلبنان. تعرفوا معنا ع  4 محلات بتعمل أطيب سندويشة فتايل بلبنان، وكل واحد عندو نكهتو المميزة!

1. فتايل وردة – الضاحية، اوتوستراد هادي نصرالله

إذا كنتوا من عشاق السندويشات الطيبة، فتايل وردة هو وجهتكن بالضاحية! عندن تشكيلة سندويشات بتشهّي، من الكفتة والنخاعات للسجق والسودة، وغيرن كتير. بس الفتايل عندن غير قصة! اللحمة طرية كتير وبتتبهّر ع القد وبتتقدم بأصولها. الحلو إنو فيكن تجربوها مع الرز كطبق مندي الفتايل، أو بقلب سندويشة مليانة فتايل، بندورة، كبيس، وطراطور، ومحمّصة ع الساب. وما بيكمل الطعم إلا مع لبن عيران مسقّع. كل لقمة أطيب من التانية!

الرقم: 909 552 01 – 666 758 71

2. سندويش محفوظ – صور، السوق التجاري

سندويشة الفتايل عن محفوظ من أشهر القصص بصور، وصارت تجربة تراثية بحد ذاتها. محفوظ من أقدم المطاعم بصور وصرلو من 1952 بالمصلحة، محل زغير ومتواضع مختص بسندويشات اللحمة. بيقدم سندويشات فتايل، نخاع، سودة، مقانق، سجق، وكفتة، وكل وحدة فيها نكهة بتاخد العقل! يمكن سر نجاحو هو البساطة بتحضير سندويشات الفتايل، يلي خلت كل لبنان يجي يجرّبها. اللحمة بيعملها على بابور كاز مع رشة ملح، بهار، وحرّ، وبس تنجهز بتنتقل دغري ع الخبز العربي، لتكون النتيجة سندويشة بتشهي بكل معنى الكلمة!

الرقم: 131 740 07

3. Fatayel Sandwiches – كفررمان، النبطية

هالمحل بكفررمان مقصدكن بالمنطقة لتجربوا أطيب سندويشة فتايل. المميز إنو بيعملوها ع الطريقة التقليدية، أو مع جبنة دايبة ع الآخر وكبيس وبندورة، يعني حسب شو عبالكن تجربوا. شو عندو غير؟ سندويشات مشاوي، نخاعات، سودة، مسخّن دجاج، وحتى سمك بزري!

الرقم: 050 807 03

4. لفّة – الحمرا، شارع بلس

بتعرفوا فيكن تجربوا أطيب سندويشة فتايل من قلب الحمرا؟ اللقمة عند لفّة بتفتح النفس! لحمة الفتايل طرية وبتتبهّر برشة ملح وبهارات، بتنلف مع بندورة، وبتتغمر بصوص الطراطور، وبعدها بتنحمّص ع الساب لتعطيها هالقرشة الطيبة. مكوناتها بسيطة، بس هيدا سر طعمتها الشهية. والأحلى؟ الكمية كتير كريمة بالسندويشة! إذا فيه سندويشة لازم تجربوها عندن غير الفتايل، هي سندويشة الخاروف مع عسل. 

الرقم: 023 777 71

شو المطعم المفضل عندكن لتجربوا سندويشة فتايل بلبنان؟

شوفوا كمان، وين بتلاقوا أطيب تشيكن ساب بلبنان؟