سيرين، هيفا، ويوسف الخال بمسلسل جديد: شو القصة؟

هيفا وهبي أعلنت رسمياً عن انضمامها لمسلسل جديد بعنوان “المشتبه الرابع”، وهو أول تجربة درامية للكاتب مينا ديكران، بإخراج الأردني ليث الربايعة. بس المفاجأة الأكبر إجت لما شركة بيروت برودكشن أعلنت بعد فترة قصيرة عن انضمام سيرين عبد النور ويوسف الخال لنفس العمل، فصار عنا كاست ولا أروع!

سيرين عبد النور كشفت شوي عن شخصيتها بالمسلسل، وقالت إنها رح تلعب دور “سارة”، يلي بتشبه الحية! ووصفتها بطريقة غريبة: “الحية مسمة وبتلدغ، بس يلي بيمسكها من رقبتها رح تلدغو، وإذا بعد عنها ما بتعملو شي.” يعني باختصار، الشخصية مليانة مفاجآت ومش معودين نشوف سيرين بهيك دور.

أما يوسف الخال، فانضم للبطولة مع كوكبة من نجوم العرب، من سوريا، الكويت، السعودية، ومصر، بالإضافة لنجوم أجانب من إيطاليا وتركيا. وعنجد اشتقنا نشوفوا على الشاشة الزغيرة. تصوير المسلسل رح يكون بعدد من الدول، منها روسيا وإيطاليا، يعني عم نحكي عن إنتاج ضخم ومشهدية عالمية.

شركة بيروت برودكشن أكدت إنو المسلسل واحد من أضخم الإنتاجات العربية المرتقبة لموسم 2025، وإنو مش بس مسلسل واحد، بل رح يكون 3 مواسم متتالية! وهيدا الشي بيخلينا نتوقع قصة معقدة مليانة تشويق وغموض.

أما المفاجأة الأكبر، فهي إنو المسلسل رح ينعرض على منصة عالمية! يعني مش بس محصور بالوطن العربي، بل رح يوصل لكل العالم. فالسؤال هلق: مين متحمس يشوف هالتريو سوا لأول مرة؟

شوفوا كمان، بتعرفوا إنو إختها للصبوحة كانت ممثلة معروفة؟