بتعرفوا إنو إختها للصبوحة كانت ممثلة معروفة؟

الكل بيعرف صباح، الأسطورة اللي ما في متلا، بس مش الكل بيعرف إنو أختها لميا فغالي كانت ممثلة قوية بالفن اللبناني. لميا ما قدرت تسبق صباح بالتمثيل لكنً ما في شك إنو تركت بصمة كبيرة بالمسرح والتلفزيون. صوتها، حضورها، وأدائها خلوها من رواد الدراما اللبنانية بفترة الزمن الجميل.

لميا فغالي بلشت مسيرتها صدفة وهي بعدا صبية، وكان أول دور إلها بمسرحية جوالة بأحد الضيع اللبنانية. بعدها، اشتغلت بالإذاعة اللبنانية مع مخرجين كبار متل ميشال هارون، وهيك تعرفت على الصحافي فاضل سعيد عقل، اللي صار جوزها بعدين. ومع كل هالنجاح، قررت تبعد عن التمثيل فترة، بس رجعت بقوة سنة 1964.

ورغم إنو صباح خطفت الأضواء، لميا كانت الممثلة اللي الكل بيحترمها. شاركت بعدد كبير من المسلسلات والمسرحيات، ووقفت حد أسامي كبيرة بالتلفزيون اللبناني. كانت معروفة بقوة شخصيتها، أدائها الواقعي، وطريقة نطقها السليمة اللي خلتها تصير وحدة من أهم الأسامي بالدراما.

ما حدا بينسى دورها بمسلسل “المعلمة والأستاذ” كأم هند أبي اللمع، ولا أدوارها القوية بالمسلسلات اللي كانت فيها دايماً تترك أثر. ومع كل هالنجاح، كانت إنسانة متواضعة وطيبة، محبوبة من زملاءها، وملهمة للكتاب والشعراء.

لميا فغالي رحلت سنة 2005، بس إسمها بعدو منور بذاكرة الدراما اللبنانية. يمكن ما كانت تحت الأضواء متل صباح، بس كانت ممثلة حقيقية، بنت المسرح والتلفزيون، والناس اللي حضروها بيعرفوا قيمتها منيح!

شوفوا كمان، بمناسبة عيد ميلاد الشحرورة صباح: كل شي ما بتعرفوه عنها!