بعد شهور من الإغلاق… باتيسري كريمينو رجعت على حارة حريك!

من بعد شهور من الإقفال بسبب الحرب، كريمينو فرع حارة حريك رجع فتح بوابو اليوم! هالمحل اللي الكل بحبو تعرّض لضرر كبير من الغارات، واجهتو تكسّرت بالقصف، وجواتو ما سلم من الدمار. كل المنطقة كانت متضررة، وكتير محلات اضطرت تسكر، بس اليوم، رجعوا وفتحوا أبوابن من جديد!

خلال فترة الإغلاق، ضل كريمينو يستقبل الزوار بفرع الصنايع، وحتى توسّع أكتر وفتح فرع جديد بخلدة! الفرع الجديد فيه قعدة مكنكنة، مثالية لتستمتعوا بأطيب المخبوزات مع فنجان قهوة.

الكل بيعرف إنو كريمينو إسم على كل لسان، من الكاتويات الطازة للفريزييه اللي بيدوب بالتم والآيس كريم اللي ما بيتفوت! رجعتو لحارة حريك مش مجرد فتحة محل، هيدي قصة صمود وعزيمة. وأخيراً، عشاق كريمينو صار فيهن يرجعوا يتلذذوا بحلوياتن المفضلة بالمكان اللي بلش منو كل شي!

أهلا وسهلا فيكن من جديد!

شوفوا كمان، هيدا الزلمي حول بيتو لمطعم ساحر!