تعرفوا على هالمطعم الفرنسي ببرمانا يلي عمرو أكتر من 50 سنة

إذا بدكن تجربة عنجد عفوية وبعيدة عن الفخفخة والضجة والعجقة، لازم تحطوا Le Gargotier على ليستة المطاعم اللي لازم تزوروها! هيدا المحل موجود ببرمانا من سنة 1971، وكتار بعدن مش سامعين في. بس اللي بيعرف هالمحل، رح صير يضل يجي!

ما عندن إنستا، بس عندن أكل بياخدكن ع فرنسا!

مطعم Le Gargotier مش مطعم جديد ولا ترندي، بس هو من أول المطاعم الفرنسية بلبنان. جو دافي، فيكن تقعدوا جوا بين الديكور القديم والموقدة، أو برا ع التراس وتاخدوا نفس الجبل النضيف.

^{Credits: Guide by Anastasia Pakhomovskaya}

بس شو بتاكلوا هون؟

أكيد أول شي لازم تطلبوا الإسكارغو، وعيشوا الجو ع الآخر مع صوت Joe Dassin والأغاني الفرنساوية القديمة اللي بيحطوهن بالمحل. وبعدا عندن شوربة البصل اللي مستحيل تلاقوا متلا، طعمة بتدفي القلب وأكيد الستيك الفرنسي الشهير! وما فيكن تخلصوا العشا بلا ما تجربوا الحلو الباريزي الشهير.

السر؟ الشيف بعدو نفسو من 1971، يعني النكهات بعدها متل ما كانت من 50 سنة!

^{Credits: Guide by Anastasia Pakhomovskaya}

الجو بالمطعم عن جد غير شكل، بتحسوا حالكن بفيلم فرنسي قديم، والأجواء الحميمية بتخليكن تحسوا كأنكن ببيت أصحابكن مش بمطعم. هون ما في ضجة وما في عجقة، كل شي ع رواق، وبتحسوا كل طبق معمول بحب وإهتمام، مش متل المطاعم اللي همها بس تلحق الطلبات.

^{Credits: Guide by Anastasia Pakhomovskaya}

إذا بدكن مطعم بيجمع البساطة والأصالة، Le Gargotier هوي المكان الصح. تجربة بعيدة عن العجقة، وأكل طيب ع أصولو، وجو بيخليكن تفصلوا حالكن عن كل شي. إذا بعد ما زرتوا، بعدكن ما جربتوا الطعم الفرنسي ع أصولو!

العنوان: برمانا
الرقم: 254 343 03

شوفوا كمان، ٩ مطاعم بلبنان بتقدم بوفيه مفتوح بأفضل الأسعار!