صاحبة غنية “لما بمشي على الرصيف”، مين هي وليش اختفت؟

بتتذكروا غنية “لما بمشي على الرصيف”، يلي صارت جزء من ذكريات الزمن الجميل وأحدثت بوقتها ضجة كبيرة لأن كانت جريئة وغريبة بنفس الوقت؟

إذا كنتوا من محبي الأغاني اللبنانية القديمة، أكيد مرقت هالغنية بأذانكن. غنية جريئة وغريبة بوقتها، صار إلها مكان خاص بالفولكلور اللبناني وبالذاكرة الجماعية برددوها الجيل الجديد والقديم. وصارت الناس من جيلنا تسأل: يا ترى مين صاحبة هالصوت الحلو والرقيق؟ وليش اختفت؟

الفنانة يلي غنت “لما بمشي عالرصيف” هي الفنانة ميشكا، كانت بوقتها وجه معروف. صدرت الغنية سنة 1980 بفيلم “آخر الصيف”، وكانت من كلمات غدي الرحباني وألحان مروان الرحباني، ولاد الشاعر الكبير منصور الرحباني.

مش بس انعرفت بالغنية، ميشكا كمان شاركت بدعايات تلفزيونية مشهورة، وأشهرها إعلان: “شو بطاريتك؟ رايوفاك!”، يلي كل جيل التسعينات بيتذكرو. لكنّ فجأة وبسبب الأوضاع الصعبة بلبنان، تركت ميشكا لبنان وسافرت على أمريكا، وانقطعت أخبارها لسنين طويلة. لا أخبار، لا غنية جديدة، ولا مقابلات.

آخر ظهور معروف لإلها كان بغنية “أحلى مشوار” مع حكمت وهبي، ومن وقتها ما عاد في أي خبر ملموس عنها.

وميشكا مش الفنانة الوحيدة يلي اختفت عن ساحة الفن بلبنان. في متلها كمان نينا وريدا بطرس، الاختين يلي انشهروا من ورا صواتن الحلوة وكان أول ألبوم لإلن هوي “ليالينا” بعام 1995، ورجعوا أصدروا ألبوم “بأمارة ايه” عام 1996.

شوفوا كمان، ٥ فنانين من إيام التسعينات اختفوا فجأة ووين صاروا!