قريباً، بيت فيروز لمتحف فني مفتوح لكل الناس!

خبرية حلوة! بيت طفولة السيدة فيروز بزقاق البلاط رح يصير متحف استثنائي بيحكي عن قصتها وسيرتها الفنية التاريخية! 

هالخطوة مش جديدة، كان فيه كتير دعوات ع مر سنين لتحويل هالبيت القديم لمعلم ثقافي مفتوح للناس. وأخيراً من بعد سنين من الإهمال من قبل الوزارات المتعاقبة، صار في حكي جدي بالموضوع! قررت وزارة الثقافة بالتعاون مع المؤسسة الوطنية للتراث بإطلاق هيدا المشروع. حسب مقال جاد فقيه بصحيفة النهار، رح يتم شراء الأرض، ترميم البيت القديم من أول وجديد، ليصير متحف فني بيحتفل بالسيدة فيروز كأيقونة لبنان وأسطورة فنية عندها تاريخها الحافل وقصتها. 

ومع إنو وزير الثقافة وافق على الفكرة، التحدي الكبير والحقيقي هلق هو تأمين التمويل الكافي لحتى نشوف هالمشروع عم يتحقق ويصير بيت فيروز معلم ثقافي للكل!

قبل فترة، زورنا البيت التاريخي بزقاق البلاط وهيك كان مهمل ومهجور بكنوز مخباية:

البيت المشهور قطعة حيّة من ذاكرة بيروت. بيتميز بأسلوب العمارة العثماني القديم من القرن الـ19، هو البيت اللي ولدت وترعرعت فيه السيدة فيروز وقضت حياتها مع عيلتها فيه، بيت بيروتي قديم بشبابيك مقنطرة وجنينة فيها شجر الأكيدنيا ونافورة ميّ عتيقة. البيت من حيطان وسقوفية وبلاط وبواب وشبابيك بحاجة لدعم وترميم من أول وجديد. فيكن تقروا عن تاريخو أكتر بمقالنا هون.

شوفوا كمان، من أرشيف الزمن الجميل، ٢٠ صورة نادرة للست فيروز!