وين فيكن تاكلوا طبق المنسف الأردني بلبنان؟

إذا جربتوا المنسف الأردني بالأردن، بتعرفوا إنه أكلة بتجنن! هالطبق الوطني غني بالنكهات وبيشبع القلب قبل المعدة. وإذا كنتوا مشتهيينو أو بدكن تجربوه لأول مرة من دون ما تحجزوا تذكرة طيارة، هيدي الأماكن بلبنان بتقدملكن المنسف الأردني على أصوله!

١. Cuizen، الأشرفية

بمنطقة الأشرفية، حد Grand Lycée وقريب من Le OUF، بتلاقوا Cuizen، مطعم زغير وحميمي بيقدم أكلات ثقافية بلمسة بيتوتية. المنسف هون مطبوخ بحب، وكل لقمة بتحسسكن كأنكن قاعدين ع سفرة أردنية أصيلة.

٢. قهوة أنطون، عمشيت

إذا بدكن قعدة ديوان عربي مع أجواء تراثية، Ahwet Antoun بعمشيت هوي المطرح الصح! بيقدمو المنسف الأردني بالطريقة الأصيلة، وحتى فكروا بالتفاصيل الزغيرة، لأنهن بيعطوكن كفوف للأكل إذا بتحبوا تاكلوا عالطريقة الأردنية الأصيلة من دون ما توسخوا إيديكن.

أماكن تانية لتجربة المنسف مش ضروري يكون أردني 100%

٣. أبو العز، الدكوانة، ضبيه وجونيه

إذا زهقتوا من الشاورما عند أو العز، ليش ما بتجربوا المنسف عندن؟ بيقدموا يا مع دجاج مشوي أو بروستد، مع رز أصفر مليان نكهات، وبيطلع معن طبق ما بيتفوت!

٤. Baytna Express، طرابلس

Baytna Express معروف بالأكلات اللبنانية الطيبة، بس كمان عندن منسف ع لحمة أو ع دجاج، والصراحة، الطعمة روعة! إذا كنتوا بالشمال، ما تفوتوا هالفرصة وجربوا.

هول الأماكن بيخلوكن تعيشوا تجربة المنسف الأردني ع الآخر، بلا ما تسافروا! يمكن كمان يعجبكن: هيدا المحل عم يعمل أطيب سندويشات بحرية بنص بيروت!