هيدا الزلمي حول بيتو لمطعم ساحر!

شي مرة تخايلتوا إنكن تفوتو على بيت حدا وتلاقوا مطعم؟ هيدا بالزبط اللي صار مع Jo Rooftop، محل فريد من نوعو بقلب كفور، حول بيت عادي لمطعم بيطل على فيو بياخد العقل! بلش كـ rooftop بسيط، وبعد فترة، قرر صاحبو يحولو لمطعم كامل، مع أجواء حميمة وديكور بيدفى القلب.

القعدة هون غير شكل، خاصة إذا قعدتوا حد الشباك وشفتوا الجبال قدامكن، أو حد الشيميني بالشتوية مع لقمة سخنة من إيدين أصحاب المحل. الأكل؟ طازة وبيتوتي ع الآخر، وبيجمع بين المطبخ اللبناني والأجنبي. عندن مازة لبنانية ممدودة بسعر 22$ الشخص وإذا كنتو 4 أو أكتر بتصير ب20$، فيها كل شي من تبولة، بطاطا حرة، ورق عنب، وصولاً للمشاوي. يعني، سفرة كاملة ببيت دافي مع منظر خيالي.

إذا بتحبوا التجربة المختلفة، جربوا الـ Italian Mushroom، وهوي خبزة باغيت محمصة بالفرن مع جبنة دايبة وفطر بنكهة خيالية! وكمان عندن سندويش فاهيتا على كاراميل، ميكس غريب بين الحلو والمالح بس طعمتو غير شكل. وطبعاً، ما فينا ما نذكر الـ Smashed Burger يلي محضرة على الأصول.

أما إذا كنتوا من محبي الحلويات، ما تخافوا، لأن Jo Rooftop عندو منيو حلو بجنن وأكيد القعدة ما بتكمل بلا كاس عرق بلدي مع هالأجواء الحلوة!

هيدا المحل مش بس مطعم، هوي تجربة كاملة. جو دافي، أصحاب المحل بيستقبلوكن كأنكن ببيتكن، والأكل بيشبع النظر والمعدة. إذا بعد ما زرتوا، صار وقت تحجزوا وتعيشوا هالتجربة الحلوة!

العنوان: كفور
الرقم: 960 996 70

شوفوا كمان، محل واحد بلبنان بخليكن تحضروا الباستا تبعكن بدياتكن.