لبنان يتألق: مطعمين ضمن أفضل 50 بالشرق الأوسط وشمال أفريقيا!

“The World’s 50 Best Restaurants” نشروا القائمة السنوية لأفضل 50 مطعم بالشرق الأوسط وشمال أفريقيا 2025، وهالسنة مطعم أورفالي بروس بيسترو بدبي أخد المركز الأول، واللائحة شملت كمان مطعمين لبنانيين.

المطعم اللبناني الأعلى تصنيفًا هالسنة كان إم شريف بالمرتبة التاسعة، وبيوصفوه المنظمين بالتعابير التالية:

“… تجربة الأكل اللبناني اللي عن حق وحقيق، بتقدم إلكن إم شريف طعم الأكل التقليدي بالأجواء الفخمة اللي بتحسسكن كأنكن عم تاكلوا على طاولة مطبخ الشيف الشخصية”.

وكمان بينصحوا تجربوا عند إم شريف الكبة النية والمهلبية.

مطعم بارون كمان لحقو بالمرتبة #42:

هيدا المطعم مهضوم وبسيط مخبى بشوارع مار مخايل الأرمنية الفنية ببيروت. بارون مهتم بالاستدامة وبيفتخر إنه بياخد المكونات من الأسواق المحلية والمزارعين والصيادين. شو الطبق المميز اللي لازم تجربوه؟ القرنبيط المحمص والمبهر يلي كلنا منعرفه ومنحبه!

عدد المطاعم اللبنانية يمكن أقل هالسنة، بس وجود هالمطاعم الممتازة بيسلط الضو على التميّز المستمر لقطاع المطاعم بلبنان. انشالله منشوف مطاعم محلية أكتر عم تحتل مراتب بالقائمة بالمرة الجاية!

لتشوفوا تصنيفات السنة الماضية، اضغطوا هون.

شوفوا كمان، الشاورما اللبنانية بالمرتبة الأولى ع قائمة أفضل سندويشة بالعالم