مسلسل جديد لدانييلا رحمة برمضان 2025… التفاصيل هون!

مسلسل جديد كلنا ناطرينو مليان مفاجآت… رمضان الجايي رح يكون غير شكل مع مسلسل “نفس”، اللي بيجمع دانييلا رحمة، عابد فهد، ومعتصم النهار.

نفس: قصة مشوّقة وشخصيات غامضة

القصة بتحكي عن الحب، التضحيات، والصراعات اللي بيواجهها الإنسان بظل الحقد والحسد. دانييلا كشفت عن شخصيتها “روح شهاب” من خلال صورة على إنستغرام وكتبت: “أنا روح شهاب… لو ما العتمة ما كنت شفت حقيقتي.” شخصية غامضة ومليانة أسرار رح تخلي الأحداث مشدودة من البداية.

أول مفاجأة هيي الشارة! الغنية من كلمات وألحان المبدع مروان خوري يلي كلنا مننطر أغانيه وخصوصي بالمسلسلات. وحزروا مين رح يغني المقدمة؟ بحسب موقع بصراحة، أجمل صوت بلبنان، الفنانة عبير نعمة. بتتذكروا شو كانت أول شارة غنتها عبير نعمة؟ غنية مسلسل “مريانا” اللبناني المعروف. مزيج فخم، خصوصي إنو مروان معروف بنجاحاتو بشارات المسلسلات، وعلاقتو الفنية بعبير حققت نجاحات كبيرة بالحفلات الأخيرة. فينا نقول من هلّق إنو الشارة لحالها رح تكون أجمل شي رح نسمعوا برمضان الجايي!

أما المفاجأة التانية، فهيي إنو رح ينعرض المسلسل حصرياً على شاشة MTV برمضان 2025. يعني جمهور القناة والدراما اللبنانية ناطرين 30 حلقة مليانة أحداث مشوقة، قصص عميقة، وأداء رح يترك بصمة بالشاشات.

والأجمل من هيك إنو المسلسل انشغل عليه بطريقة بتقرب القصة أكتر من الواقع، لأنو مستوحى من أحداث حقيقية وشخصيات بعدها عايشة بيناتنا! فريق العمل التقى بهالأشخاص واستوحى تفاصيل القصة منن ليعطيها مصداقية أكبر. حتى التصوير عم يكون بمناطق لبنانية متل المتن الشمالي، جونية، والبترون، وهالشي بيعطي جو لبناني حقيقي للمشاهد.

مسلسل “نفس” بدون شك رح يكون من أكتر الأعمال المنتظرة، ورح يصير حديث الكل بشهر رمضان!

شوفوا كمان، حزروا شو؟ مهرجانات الأرز الدولية راجعة هالصيفية!