حزروا شو؟ مهرجانات الأرز الدولية راجعة هالصيفية!

وأخيرًا، رجعت الأجواء الحلوة على لبنان! مهرجانات الأرز الدولية اللي مننطرها كل سنة، راجعة تضوي سما لبنان من جديد بصيف 2025. وهالسنة، الحدث الأهم هوي افتتاح المهرجان بفرقة ميّاس اللبنانية العالمية، يلي رفعت إسم لبنان بكل العالم.

ميّاس: فخر لبنان العالمي

الافتتاح الرسمي للمهرجان رح يكون مع ميّاس، الفرقة اللي خطفت قلوب العالم برقصها وأدائها المذهل بعرض حصري ووحيد بمسرح الأرز بصيف 2025. إذا عبالكن تحضروا، البطاقات متوفرة ابتداءاً من 3 شباط بكل فروع “Ticketing Box Office” أو أونلاين.

بهالسنين اللي مرقت، مهرجانات الأرز كانت من أبرز المهرجانات بلبنان. استقبلت أكبر الأسماء العالمية متل شاكيرا وأندريا بوتشيلي، وقدرت تحط لبنان على خارطة السياحة الفنية بالعالم. هالمهرجان كان دايمًا مساحة لنتفاخر فيها بثقافتنا ونستقبل العالم بأحلى صورة.

مفاجآت صيف 2025

غير هيك، وعدتنا لجنة مهرجانات الأرز الدولية بموسم مليان مفاجآت فنية وثقافية ضمن المهرجان ما بتنتسى. البرنامج رح يجمع بين الأصالة والتجدد، ورح بيخلينا نعيش أحلى اللحظات مع التراث والإبداع اللبناني. بعد كم يوم، رح يعلنوا عن كل تفاصيل المهرجان بمؤتمر صحافي.

لبنان: أمل جديد وإيام حلوة جايي

النائب ستريدا جعجع أعلنت عن عودة المهرجان ببيان كلو تفاؤل وأمل، خصوصي بعد انتخاب الرئيس العماد جوزيف عون وتشكيل الحكومة الجديدة قريباً. هالخطوات، حسب قولها، هيي نافذة أمل للبنان وإيامو اللي جايي.

صيف لبنان 2025: إيام العز راجعة!

صيف هالسنة مش متل أي صيف. التحضيرات والمؤشرات كلها بتقول إنو لبنان راجع بقوة على خارطة السياحة العالمية. حفلات، مشاهير عالميين ولبنانيين، ومهرجانات رح تخلينا نعيش صيف ما بينتسى.

والله اشتقنا للبنان الفرحة، لبنان اللي كل صيفية بيجمعنا بأحلى الذكريات. حضروا حالكن، لأن رح نكون على موعد مع صيف الأحلام!

شوفوا كمان، حزروا شو؟ برنامج “كيف وليش” لديديه راجع عالشاشة!