أجمل ٩ كافيهات مع جنينة بقلب بيروت

عم تبرموا ع محل تنسوا حالكن فيه ببيروت؟ ما إلكن إلا قعدة الجنينة، بين الخضار والورود بعيد عن ضجة المدينة. خلونا ندلكن على أجمل 9 كافيهات مع جنينة بقلب بيروت!

1. آغورا، الأشرفية

عبالكن قعدة بين الشجر ببيروت بتاخد العقل؟ خلونا نخبركن عن آغورا، جوهرة مخفية وسط المدينة، وعبارة مطعم وكافيه وبار بمكان واحد!

آغورا قاعد بقلب بيت بيروتي قديم، بيتميز بالموديل العتيق، الكراسي الخشب، القناطر العالية، وأجمل شي قعدة جنينة ساحرة مع نافورة الميّ. 

اطلبوا قهوتكن واستأنسوا بالجو الرايق بين الخضار! مكان مناسب لترتاحوا شوي وكمان تخلصوا شغلكن ع رواق. وبالليل، فيكن تستمتعوا بمشروبات منعشة مع أكل طيب، وسهرات موسيقية لايف!

من أكتر المطارح يلي منحب نزورها ببيروت! ما تنسوا تابعوهن ع الإنستغرام هون.

للتواصل ع الرقم: 304 109 70.

2. بيت، مار مخايل

زوروا كافيه بيت بمار مخايل وعيشوا أجواء بيتوتية ساحرة! من القعدة ع البلكون يلي بيطل ع الشوارع الجميلة، لقعدة الجنينة بين الورود والشجر، هالكافيه عنجد رح تنغرموا فيه. اطلبوا لاتيه عندن، مع كيك بيحلي القلب.

الرقم: 390 761 76

3. جاكرندا، مار مخايل

كافيه ومطعم مستوحى من شجر الجاكرندا ببيروت. جربوا عندن القعدة تحت فيّات هالشجرة العالية، أو ع التراس المطل ع جمال بيروت.

الرقم: 522 637 76

4. أباجور، العدلية

كافيه عنجد بحسّسكن كأنوا قاعدين بجنينة البيت تحت الشجرات، وحولكن الناس يلي بتحبوهن. عدا عن الأكل الطيب والقعدة الحلوة، المسا بيعملوا جو مميز للسهر.

الرقم: 050 614 01

5. Kalei Coffee، راس بيروت ومار مخايل

كافيه بعيّشكن تفاصيل البيت البيروتي العتيق، بتقعدوا عندن ع البرندا وقدامكن جنينة شجر، مخبوزات شهية، وقهوة مختصة.

الرقم: 342 780 03

6. أوريندا، مار مخايل

زاوية من الفرح والسعادة وسط الأشرفية، عندن جو ملون ولطيف بين الشجر لتستأنسوا بالقعدة مع أصحابكن!

الرقم: 886 927 03

7. صالون بيروت، الحمرا

جوهرة مخباية بالحمرا، بترجعكن ع عصر الجاز والستينات. المميز عندن إنو فيه قعدة جنينة مكنكنة كتير رح تحبّوها، خاصةً إذا رحتوا وقت برانش أو الصبحيات.

الرقم: 317 133 03

8. Le Jardin Beirut، الأشرفية

مطرح مميز لتسهروا ع رواق مع أصحابكن، أنتو ومغمورين بالشجر وين ما كان!

الرقم: 076 343 03

9. كافيه يونس، الحمرا

جربوا ألذ قهوة ببيروت وسط جنينة بنص الحمرا، مع قعدة قديمة بتذكركن بكنكنة ودفى البيت!

الرقم: 577 397 01

خبرونا، حبيتوا دليلنا ل كافيهات مع جنينة بقلب بيروت؟ أي رح تختاروا؟

شوفوا كمان، أطيب 9 محلات لتدوقوا برانش غير شكل بلبنان