ليش الأرمن بعيدوا عيد الميلاد لحالن؟ شو القصة وراها؟

بتعرفوا ليش الأرمن بعيدوا عيد الميلاد بـ 6 كانون التاني بدل 25 كانون الأول؟ القصة مش بس شوية تواريخ، فيها عادات، تقاليد، وقرارات كنسية صرلها ميات السنين. تعوا نغوص بهالتاريخ سوا ونكتشف شو يلي خلا الأرمن يضلوا محافظين على هالتاريخ المميز!

لي الأرمن ما بعيدوا بـ 25 كانون الأول؟

من إيام الرسل، كانو كل المسيحيين يعيدوا الميلاد بـ 6 كانون التاني. بس بالقرن الرابع صار في تغيير لما قررت الكنيسة الغربية تعتمد 25 كانون الأول كعيد الميلاد. السبب؟ كانوا بدن يطغوا على عيد وثني مشهور بهاليوم، يلي كان مخصص لـ “إله الشمس”.

المسيحيين الغربيين قرروا يخلوا 25 كانون الأول عيد رسمي لميلاد المسيح، والـ 6 كانون التاني عيد الغطاس. بس الأرمن؟ ما تأثروا بهالتغيير لأن ما كان عندن هالممارسات الوثنية، وكمان لأن كنيستن ما كانت مرتبطة مباشرة بالكنيسة الرومانية. هيك، الأرمن ضلوا متمسكين بعادات أجداددن وبيحتفلوا بعيد الميلاد بـ 6 كانون التاني لليوم.

شو الفرق بين عيد الميلاد وعيد الغطاس؟

بالكنيسة الأرمنية، عيد الميلاد ما بينفصل عن عيد الغطاس. هالعيدين بيرمزوا لتجسد المسيح ومعموديتو، وبيشكلوا جزء أساسي من موسم الاحتفالات. يوم عيد الميلاد بـ 6 كانون التاني، الأرمن بيعملوا احتفال إسمو “بركة المي”، لتذكّر معمودية المسيح بنهر الأردن. هالتقليد بيعطي العيد طابع روحاني ومعنى أعمق.

عيد الميلاد قبل المسيحية؟

قبل ما يصير 25 كانون الأول عيد الميلاد، كان هاليوم عيد لـ “الشمس التي لا تقهر” بالإمبراطورية الرومانية. من سنة 220 م، حاول الإمبراطور الروماني يخلي عبادة الشمس رئيسية. وهيدا الشي أثّر على كتير أمور، لدرجة إنو صورة “إله الشمس” صارت تظهر على العملة الرومانية. ومع انتشار المسيحية، الكنيسة الغربية قررت تغير هالعيد الوثني وتخصصه لولادة المسيح باعتبارو هوي النور الحقيقي. هيك صار 25 كانون الأول عيد الميلاد، بس الأرمن ما اتأثروا بهل تاريخ، لأن تقاليدن كانت مختلفة تماماً.

لي الكنيسة الأرمنية تمسكت بـ 6 كانون التاني؟

الأرمن ما شافوا داعي ليغيروا تقاليد أجداددن، خصوصي إنو عيد الميلاد بـ 6 كانون التاني كان شغلة كل الكنائس قبل القرن الرابع. كنيستن ما كانت تابعة للكنيسة الغربية، وهيدا خلاهن يحافظوا على هويتهن وتقاليدن، يلي بتظهر بتفاصيل الاحتفالات والعادات لليوم.

ليش في اختلاف بين الكنائس؟

رغم إنه المسيحية عندها نفس الإيمان والعقيدة، بس الخلافات الكنسية حول تواريخ الأعياد، خصوصي الميلاد والفصح، خلقت نوع من الانقسام بين الكنيسة الشرقية والغربية. الأرمن وغيرن من الشرقيين اختاروا يضلوا ملتزمين بالتاريخ القديم، وهالشي بيعطي طابع خاص ومميز لعيد الميلاد الأرمني.

شوفوا كمان، شو يعني “بسترينتي عليك” وليش منقولها ع راس السنة.