محل جديد بديل لل McDonalds فتح ببيروت، هيك قصتو والأسعار!

مافي شي بيفتح النفس على إسبوع جديد متل الأكل، كيف إذا كان متل أكل الماكدو وأطيب؟ وبنفس الوقت بخليكن تدعموا المطاعم المحلية؟؟ روعة.

هيدي هي قصة ميت واي، المحل الجديد بشارع بليس يلي عم يقدم طعمة مشابهة للماكدونالدز، بس مع نكهة خاصة وأطيب بمية مرة. إذا كنتو من محبي الماكدو، هالمحل رح يصير وجهتكن المفضلة. ميت واي Meat Way بقدملكن كل شي بتحبوه من البرغر، البطاطا المقرمشة، والناغتس بأسعار بتجنن.

الولاد، رح يكيفوا في!

ميت واي: بديل ماكدونالدز يلي ما رح تندموا عليه

البرغر عندن بيشبه الـ بيغ تيستي بس بنكهة أطيب وبسعر 000 680 ل. ل. وعندن كمان البطاطا المقرمشة مع صوص الهوني ماستارد، ولا أطيب من هيك. إذا كنتوا من محبي الناغتس، فيكن تطلبوا ناغتس بتشبه ناغتس الماكدو، وحتى الـ كورلي فرايز مش رح تلاقوا متلها ب 000 420 ل. ل. واذا جربتوا الدوبل تشيز برغر ب 000 550 ل. ل. رح تصيروا مدمنين عليه، لأنه بالضبط متل اللي بتلاقوه بالماكدونالدز، وحتى العلبة اللي بيتقدمو فيها الأكل بتشبه علب الماكدو.

المحل ما عنده قعدة داخلية، بس فيكن تاخذوا الأكل معكن وتتمشوا. إذا كنتوا ع الطريق أو بالشغل وما عندكن وقت تفكروا شو بدكن تاكلوا، ميت واي هوي الحل المثالي.

المنيو بسيط بس قوي، وفيه كل شي بتحبوه: بيغ ميت برغر، فيليه فيش، تايستي ميت، باوند ميت وتشيز، تشيز برغر، هام برغر، دوبل تشيز برغر، بيغ ديلوكس، موزاريلا برغر، وسندويش هوت دوغ وغيرن كتير.

وشو ما كانت وجبتكن، غمّسوا البطاطا المقرمشة من ميت واي بالصوص اللي بيخطر عبالكن مع كباية كولا.

وإذا بتحبوا البوظة، عندن بديل للماكفلوري! بوظة الأوريو أو اللوتس متل ما بتتوقعوها، مع كبايات البوظة الكلاسيكية تبع الماكدو على طعمات الشوكولا، الكراميل والفريز. يعني حتى البوظة عندن رح تروقلكن أعصابكن!

ميت واي هوي المنافس المحلي الأول ل الماكدونالدز، بطعم دجاج مقرمش ألذ وأسعار مميزة.

هالمحل عم ينتشر عالسوشال ميديا هلق بسبب البرغر اللي بيقدموها بسعر حلو، مع وجبات مطابقة لمطعم ماكدو وألذ، بيقدملكن وجبات للعيلة و برغر بيشهي.

ونيالو يلي قريب من شارع بليس أو بيقطع في كل يوم، في يضل ياخد وجبات من عند ميت واي قد ما بدو.

العنوان: الحمرا، شارع بليس

شوفوا كمان، مرا وجوزا إجو من الجنوب ع بيروت وفتحوا سناك ولا أهضم