شو علاقة الفنانة اللبنانية قمر بجمال عبد الناصر؟

بتعرفوا إنو جمال عبد الناصر عندو حفيد لبناني؟ وحدة من أكتر القصص المثيرة بلبنان، بتخص الفنانة اللبنانية “قمر“، اللي بتجمعها حسب قولها قصة غريبة مع رجل الأعمال المصري جمال مروان، حفيد جمال عبد الناصر. بلشت القصة سنة 2008، لما كان عمر قمر بس 22 سنة، وسجلت أول غنية إلها على قنوات ميلودي.

بلشت قمر مشوارها الفني مع شركة الإنتاج المصرية “ميلودي” لصاحبها جمال مروان، حفيد الرئيس جمال عبدالناصر. ومن هون بلشت علاقة حب وغراميات بيناتن، رغم إنو جمال كان مجوز وعندو عيلة. العلاقة تطورت، ووصلت لزواج عرفي، يعني بالسر، بس ما كملت متل ما كانت “قمر” متوقعة.

بعد شهر واحد من الزواج، خبرت قمر جمال إنها حبلي. بدل ما ينبسط، قرر يطلب منها تسافر ع لندن وتجهض الطفل! ومش هون الصدمة، الأغرب إنو قمر وافقت لأنها كانت بتحبو حب أعمى! بس تأخرت ووصلت لشهرها الخامس، وبس صار هيك رفضت الإجهاض. وهون بلشت الحرب الحقيقية بيناتن.

لما قمر رفضت طلبو، سرق عقد الزواج العرفي وسافر، جحد إنها مرتو، وجحد حتى إنو بيعرفها! وما خلص الموضوع هون، لجأت قمر للقضاء اللبناني والمصري، ورفعت قضايا لإثبات نسب إبنها “جيمي”. بس قوة نفوذو كانت أقوى، كل القضايا كانت تنتهي لصالحو.

القصة اللي ما خلصت

بالـ2011، جابت قمر ابنها “محمد”، وقررت تسمي “جيمي” ع دلع جمال، يمكن بيوم من الأيام يحن ويعترف في. سنين طويلة مرقت، وهي عم تحاول بكل الطرق تخلي يعمل فحص DNA، وبقيت تبعتلوا صور لإبنو لبركي يحن قلبو. حتى لما القضية صارت رأي عام، ما حدا قدر يجبر جمال يعترف.

نشرت قمر من كم سنة لورا صورة لابنها جيمي عبر “الستوري” على إنستغرام، تم تعديلها بطريقة يظهر فيها ابنها وسط جمال مروان، والرئيس المصري الراحل جمال عبد الناصر. وكتبت قمر على الصورة: “الأب، الابن، الجد”. الصورة كانت مفاجأة لكل العالم، لأنو كانت قمر عم بتحاول تثبت شي واضح بالنسبة إلها، حتى لو جمال مروان ما اعترف.

والشهر الماضي، أعلنت قمر إنو جيمي قدر لأول مرة بحياتو يسافر برات لبنان. ما خبرتنا كيف قدرت تزبط وراقه، بس في إشاعات إنه استخدمت جنسيتها الأميركية لتسجل الولد ع إسمها. وهون السؤال: هل هالخطوة رح تكون نهاية قصة الصراع بين قمر وجمال؟

هالقصة فيها دراما، وحب، وحتى شوية جنون! قمر بعد كل شي صار بعد عندها أمل إنو جمال يعترف بإبنو.

بالنهاية، بتضل هيدي وجهة نظر قمر حول القصة. ونظرتها الشخصية للظروف لي مرقت فيها، ورؤيتها للأحداث لي مرقت بحياتها وحياة إبنها. بس أكيد نظرة جمال مروان مختلفة. كل طرف عندو قصة خاصة، لكن ما في شك إنو هيدي القصة بتضل وحدة من أكثر القصص المثيرة للجدل بلبنان والعالم العربي.

شوفوا كمان، شو القصة الغامضة ورا مقتل الفنانة سوزان تميم؟