البترون هالشهر: معرض الميلاد وموسيقى وأكل طيب! (الدخول مجاني)

مين منا ما بيحب أجواء العيد؟ ريحة الكستنا، أغاني الميلاد، والأضوية اللي بتزين كل زاوية؟ هالسنة، البترون عم تستقبلنا من جديد بمهرجان “Batroun Capitale de Noël“، ورح ترجع تنور سوقها العتيق من 29 تشرين التاني 2024 لغاية 1 كانون التاني 2025. كل سنة منقول الأجواء ما بتتفوت، وهالسنة مبين رح تكون أحلى!

سوق البترون بالميلاد

بمجرد ما تفوتوا على شوارع السوق العتيق البترون القديمة، رح تحسوا كأنكن فتتوا على فيلم ميلادي. الزينة بتاخد العقل، الكيوسكات الخشب موزعة بكل مكان، والموسيقى الميلادية ملاية الجو. هالسوق مش بس في أكل وشرب، هوي فرصة لدعم التجار المحليين وأصحاب الحرف الزغيرة، وهيدا اللي بيخلي الأجواء أدفى وأقرب عالقلب.

لكل حدا بحب الكستنا، رح تلاقوا بياعين الكستنا عم يشووا قدامكن وكمان بتلاقوا عرانيس مشوية. ولكل مين بحب يغني، فيكن كمان تعملوا كاراوكي مع أصحابكن بنص السوق.

لمة العيلة بالأجواء الميلادية

للي بحبوا يجتمعوا مع العيلة أو الأصحاب، ما إلكن غير تنضمّوا لـ”ورشة بابا نويل” بـ”Diaspora Village” كل ويك-أند من 6 كانون الأول لغاية 30 كانون الأول، من الساعة 3 بعد الضهر للساعة 10 بالليل. خليكن جاهزين لتعيشوا تجربة ولا أروع مليانة ضحك، نشاطات، وفرحة الولاد اللي ما بتنوصف.

بترون رح تكون مليانة حفلات ونشاطات على مدار الشهر. والأحلى إنو البترون بتعرف دايمًا كيف تجمع بين الأصالة والحداثة، بهيك رح تلاقوا أجواء بتجمع الناس عالفرح وتخلّي الكل مبسوطين.

أجواء فرح، ناس عم تغني وترقص، ذكريات رح تضل محفورة براسكن سنين. جهزوا حالكن، لأن الميلاد بالبترون هالسنة ورغم كل شي عشنا، أكيد رح يكون استثنائي وما بينتسى!

حبيتوا هيدا المقال عن مهرجان البترون بكريسماس؟ تابعونا على قسم #كريسماس 2024 لتشوفوا أخبار ونشاطات العيد بلبنان!