هيك أسعار طيران MEA بالأعياد: رحلات شبه منباعة وأسعار نار!

من بعد إعلان وقف إطلاق النار الأربعاء الماضي، الآلاف من اللبنانيين المغتربين ركضوا ليحجزوا أسرع رحلة علبنان. الطلب الهائل عمل عجقة على موقع MEA، ووصل عدد طلبات الحجز لأكتر من 6,000 بفترة قصيرة. كرمال تلبّي هالإقبال، MEA أعلنت عن 32 رحلة إضافية، ورح ترجع تشغّل رحلاتها بشكل طبيعي من 12 كانون الأول.

بسبب الطلب الخيالي، أسعار التذاكر طارت لفوق، والرحلات عم تنباع بسرعة البرق. هالشي خلّى الخيارات محدودة والأسعار نار.

لنشوف شو وضع الأسعار، فتحنا موقع MEA وشيّكنا على رحلات الذهاب والعودة للدرجة الاقتصادية لشخص واحد، بين 15 كانون الأول 2024 و5 كانون التاني 2025، من مدن متل باريس، مرسيليا، برلين، إسطنبول، وعمّان.

والنتيجة؟ معظم رحلات الذهاب لشهر كانون الأول انباعت!

من باريس لبيروت

أسعار رحلات الذهاب والعودة واصلة لـ2,754 دولار.

من مرسيليا لبيروت

تذاكر الذهاب والعودة تقريبًا بـ5,300 دولار. ورحلات الذهاب شبه منباعة، وبضل في كم تذكرة درجة رجال الأعمال بسعر حوالي 3,600 دولار.

حاليًا ما في ولا رحلة ذهاب وعودة متوفرة من برلين لبيروت.

دورنا كمان على رحلات بوقفة وحدة، وطلعت الأسعار نار! الرحلات المتوفرة من برلين لبيروت عبر Air France وMEA بتوصل لحوالي 3,077 دولار على درجة رجال الأعمال، وما في أي خيار على الدرجة الاقتصادية.

ما في أي رحلة متوفرة، لا ذهاب ولا عودة، من إسطنبول لبيروت.

من عمّان لبيروت

شركة الطيران الملكية الأردنية (Royal Jordanian) رجعت تشغّل رحلاتها، وصار في بعض الرحلات ذهاب وعودة متوفرة.

الوضع مع باقي شركات الطيران

طيران الإمارات ألغى كل رحلاتو لحد 31 كانون الأول.

الاتحاد للطيران، السعودية، العربية للطيران، الطيران العماني، والخطوط الجوية القطرية علّقوا رحلاتهم لبداية كانون التاني 2025.

مجموعة لوفتهانزا علّقت رحلاتها لحد 28 شباط 2025، والخطوط الجوية اليونانية (Aegean Airlines) ما رح ترجع تشغّل رحلاتها قبل 1 نيسان 2025.

بهالوضع، بتضل ال MEA الناقل الأساسي يلي ما وقف وبعدو عم يأمن رحلات للبنان. ومع هالإقبال الكبير، واضح إنو الكل معتمد عليها لتأمين رجعتن بفترة الأعياد.

عجبكن هيدا المقال عن أسعار تذاكر ال MEA؟ شوفوا كمان، دليل أبرز مهرجانات كريسماس بلبنان لسنة 2024