هبة طوجي… صوت لبنان بحدث أسطوري قدام أهم رؤساء العالم!

النجمة اللبنانية هبة طوجي رح تمثل لبنان بأهم مسرح عالمي وبحدث استثنائي الكل ناطروا بفارغ الصبر. بـ7 كانون الأول 2024، رح تغني هبة بحفل إعادة افتتاح كاتدرائية نوتردام Notre Dame de Paris الأسطورية بفرنسا، بعد خمس سنين من الترميم يلي صار بعد الحريق المدمر يلي صدم العالم سنة 2019.

الكاتدرائية مش بس صرح ديني وتاريخي، هي معلم ثقافي وفني بيجذب ملايين الناس. الحفل هيدا مش عادي أبداً، لأنو رح يكون مليان شخصيات عالمية مهمة، متل الرئيس جو بايدن، دونالد ترامب، زيلينسكي، الملك تشارلز، الملك محمد السادس، وغيرن. وكمان رح يكون في شخصيات دينية بارزة متل الكاردينال تيموثي دولان.

وهيك هبة طوجي رح تغني قدام أهم شخصيات العالم.

هبة طوجي: صوت لبنان بالمحافل العالمية

بالنسبة لهبة، هالحدث أكيد خطوة كبيرة بمسيرتها الفنية. هبة معروفة بمشاركتها السابقة بمسرحية “Notre Dame de Paris” بدور إزميرلدا، يلي كان نقطة تحول بحياتها المهنية. المسرحية جالت فيها على أهم المسارح بالعالم، وأثبتت إنها قادرة تجمع العالم بصوتها الفريد.

هبة ما رح تكون الوحيدة بهالحفل. نجوم عالميين رح يشاركوها، متل العازف الشهير Lang Lang، الأخوة كابوسون، والفنانة أنجيليك كيدجو والنجم المحبوب غارو. كمان في كلام عن مشاركة الفنان العالمي بول مكارتني. هالشي بيأكد أهمية الحدث وضخامتو عالمياً.

كيف بتحضروا الحفل؟

لكل يلي حابين يحضروا، الحفل رح يُبث مباشر على قناة France 2 و Mtv وOne Tv وعدة قنوات عالمية الساعة 9 المسا بتوقيت فرنسا. فيكن تحضروا الحفل من بيتكن وتشوفوا هبة عم ترفع إسم لبنان قدام العالم كلو.

نجاح جديد للفنانة هبة طوجي بمسيرة لامعة

من مشاركتها بالقمة الفرانكوفونية لدعواتها الرسمية من الإليزيه، لوقوفها على أهم مسارح باريس، وصولاً لهالحدث، عم تأكد هبة طوجي إنها فنانة من طراز عالمي. نجاحاتها عم ترفع إسم لبنان بمختلف المحافل، وخلت كل لبناني يفتخر فيها.

شوفوا كمان، أسرار حياة شروق صانشاين: شو لي ما بتعرفوا عن زوجة دكتور فود؟