من جنوب لبنان… لهولندا: منقوشة المجدرة اللي لازم تجربوها!

عمركن تخايلتوا المجدرة تصير منقوشة؟ هالفكرة الغريبة والمميزة صارت حقيقة، ومين غير اللبنانيين بيقدروا يجمعوا بين الطعمة التقليدية والإبداع بطريقة هيك لذيذة؟ بالصدفة، وقعنا على اختراع جديد وكتير مهضوم عإنستغرام: منقوشة المجدرة حمرا!

هيدا الابتكار مستوحى من الأكلات الجنوبية التقليدية، خصوصي إنو المجدرة الحمرا معروفة بجنوب لبنان. ومن كتر ما أهل الجنوب المغتربين بيشتاقوا لهالنكهة، قرروا يعملوا منقوشة تكون تحية للجنوب وتراثو.

شو فيها منقوشة المجدرة؟

هالمنقوشة مش بس طعمة جديدة، هي لوحة فنية بالمكونات اللبنانية الأصيلة. بيتم خلط العدس والبرغل والبصل المطبوخ ليعطوا اللون الأحمر المميز، وبينضاف علين شوية بندورة فرش، كبيس، نعنع، وبصل مقلي بيقرمش. النتيجة؟ أكيد طعمة ولا أروع.

وين بتلاقوها؟

إذا كنتوا بهولندا، لازم تزوروا مطعم Baladi Manouche، أول مطعم لبناني متخصص بالمناقيش. هالمحل مش بس بيقدم أطيب مناقيش، لكنو بيجمع كل نكهات لبنان مع لمسة معاصرة. ريحة الفرن لحالها بتخليكن ترجعوا ع تراب لبنان مع كل لقمة.

منقوشة المجدّرة الحمرا مش مجرد أكلة، هي قصة حب لجنوب لبنان وتراثو ونحنا اللبنانية تراثنا بأكلنا ومحبتنا إلو. كل مكون فيها بيحكي عن الأصالة والجذور، وعن الشوق لأرض حملنا نكهتها معنا بكل مطرح حول العالم. ما بتكفوا إلا حتى تجربوها و تخبرونا: شو رأيكن؟

عجبكن هيدا المقال عن منقوشة المجدرة؟ شوفوا كمان، هيدي أسعار القطايف عند أشهر المحلات بلبنان