هالمكتبة المهضومة وزّعت ١٠٠ ألف وجبة على النازحين!

كافيه برزخ ببيروت أكتر من مجرد قهوة – هو مهرب لكل حدا عم يفتش ع الرواق ووقفة بالزمن بقلب الحمرا. هيدا المحل، اللي بيجمع بين جو المكتبة وريحة القهوة الطيبة، صار مكان مميز للكل، سواءً  للشغل، للقراية، أو حتى للقعدة مع أصحاب. الديكور عتيق، والجو مكنكن، والقعدة بين الخشبيات ورفوف المليانة كتب بتدخل ع القلب!

برزخ مساحة للثقافة والعطاء!

بأصعب أيام الحرب، وقف برزخ جنب الناس وأثبت إنو العطاء والإنسانية أساس كل شي. لليوم، وزّعوا أكتر من 100 ألف وجبة ع النازحين ببيروت. هالمبادرة الحلوة بتخلينا نفتخر بهيك محلات عم تقدم الدعم الضروري لناسها وأهلها، وتعبر عن روح مجتمعنا اللبناني. 

مش بس قهوة!

بس برزخ مش بس قهوة، هو قلب ثقافي نابض بالحمرا. بين عروض الموسيقى الحية يلي بيعملها، ليالي ميكروفون مفتوح، ونقاشات الكتب، بيجمع كل المبدعين، من فنانيين وكُتاب وموسيقيين بمساحة وحدة. صار ملتقى ثقافي لكل حدا عندو شغف للفن والفكر.

إذا بدكن تقروا كتاب، تحكوا مع ناس بيفكروا متلكن، أو تستمتعوا بموسيقى، هالكافيه هو مقصدكن بالحمرا. 

بمزيج بين الراحة، الغنى الثقافي، وحب الناس، صار برزخ جزء من روح بيروت. وبمدينة متل مدينتنا، يلي دايمًا بتوقف على إجريها، هالمطرح بيذكّرنا إنو الإبداع والعطاء منلاقي القوة ومنقدر نكمل الطريق سوا بالبلد.

فيكن تدعموا برزخ من خلال حسابن هون.

عبالكن تتعرفوا ع أجمل كافيهات الحمرا؟ شوفوا دليلنا هون.