شوفوا معنا كل اللبنانية على لائحة فوربس 2024

السنة، لائحة Forbes 30 Under 30 جمعت 20 لبناني من ألمع الأسماء يلي عم يلمعوا بمجالات العلوم والتكنولوجيا، التجارة والتمويل، التأثير الاجتماعي، والرياضة والترفيه. من مبتكرين عم يغيروا اللعبة لقياديين عم يصنعوا الثقافة، هالأسماء دليل إنو الإبداع اللبناني ما إلو حدود. شوفوا معنا أسماء اللبنانيين على لائحة فوربس 2024!

العلوم والتكنولوجيا

1. أسماء جراد

أسماء عم تطور أنظمة متقدمة لتصفية المي باستعمال تكنولوجيا جديدة بتشيل الملوثات. تقنيتها (المسجلة ببراءة اختراع) ممكن تنحط بعبوات المي، مغاسل، وحتى الدوش. شغلها وصلها للشراكة مع شركات بالإمارات، ونشرت 11 دراسة علمية بأهم المجلات.

٢. هيثم دبوق

هيثم هو المؤسس والمدير التنفيذي لشركة IGT يلي بتخصص بالطاقة الخضراء. الشركة نفذت أكتر من 350 مشروع بلبنان، مصر، وسويسرا، واشتغلت على أنظمة ريّ بالطاقة الشمسية بمصر. عنده براءتي اختراع وباني سيارات هايبرد شغالة على الطاقة الشمسية بلبنان.

٣. جون رشوان

جون هو شريك مؤسس لشركة Pruna AI اللي بلشت بـ 2023، وعم تشتغل على تطوير نماذج ذكاء صناعي أسرع وأصغر وموفرة للطاقة. الشركة عندها عملاء متل Volkswagen وSamsung، وجمعت 6.4 مليون دولار تمويل مبدئي من مستثمرين مثل EQT Ventures.

٤. كميل الخوري

كميل عم يركز بأبحاثه ع هندسة الأعضاء والطباعة الحيوية لمعالجة نقص الأعضاء القابلة للزراعة. شغله بالدكتوراه اللي فاز بجوائز عنه كان عن طباعة نانوية ثلاثية الأبعاد. كمان عم يقدم براءات اختراع من خلال جامعة NYU لتطويراته المبتكرة.

٥. كيفن هاني

كيفن شارك بتأسيس ELEVEN22 بـ 2023، اللي بتقدم تصاميم رقمية شديدة الواقعية لقطاع العقارات. عندهم عملاء متل GL Homes وOlayan. كيفن كمان عم يطور تطبيق BINA بمنطقة الخليج. قبل هالشركة، كان شريك مؤسس بتطبيق TripnTap اللي انباع بـ 2022 بـ 953,000 دولار.

التجارة والتمويل

٦. جاد حمادة

جاد أسس شركة HD Smart Glass بـ 2021، يلي بتقدم تكنولوجيا بتحول الزجاج العادي لزجاج ذكي شفاف أو معتم. الشركة موجودة بـ 9 دول وشغالة مع فنادق ضخمة متل Atlantis The Royal وThe Ritz-Carlton أبو ظبي.

٧. مالك وتارا جدعون

الأخوين جدعون أسسوا Gedeon Group بـ 2019 بالإمارات، وبنوا الشركة ع إرث عيلتن بعالم الموضة اللي بلش بـ 1949. الشركة بتوزع ماركات متل adidas، PUMA، وCalvin Klein، وبيديروا أكتر من 200 متجر و100 عميل بـ 30 بلد بالشرق الأوسط وأفريقيا.

8. محمد جاد الفاكهاني

الفاكهاني، المعروف بلقب “Wolfofbey”، هو المؤسس والمدير التنفيذي لشركة Beycom LLC، اللي بتختص بإطلاق، استحواذ، واستثمار أعمال التجارة الإلكترونية. تحت مظلة الشركة، في Wolfofbey، برنامج تدريب التجارة الإلكترونية اللي ساهم بإطلاق أكتر من 3,150 مشروع ناجح، وWhiteberry Media ،وكالة تسويق رقمي رائدة بتخدم أكتر من 350 عميل من 2023. مش بس هيك، Beycom بتدير مجموعة من المتاجر الإلكترونية البارزة متل ابتسامتي، Bisou، وStakked، اللي عم تساهم بتطوير مشهد التجارة الإلكترونية بالمنطقة.

9. ياسمينا حايك

بتتولى حايك الإشراف على تطوير قوائم الطعام، التوجيه الطهوي، تدريب الفرق، والتوسع الدولي لمجموعة مطاعم عيلتها إم شريف. المجموعة بتخدم أكتر من 10,000 زبون يومياً عبر 24 فرع منتشرين بمنطقة الشرق الأوسط وشمال أفريقيا، أوروبا، وأمريكا الجنوبية. تحت مظلة المجموعة علامات مميزة متل مطعم إم شريف وإم شريف كافيه، وحالياً توسعت بفتح إم شريف بموناكو وإم شريف ديلي ببيروت، مع خطط مستقبلية لتوسع أكبر وأبعد.

التأثير الاجتماعي

10. مارينا الخوند

أسست الخوند جمعية ميدونيشنز وهي بعمر 18 سنة لتأمين مساعدات طبية مجانية بلبنان بعد انفجار بيروت. بعام 2022، أطلقت عيادة فري هيلث تيك ببيروت، وبعام 2023، سجلت الجمعية رسمياً بفرنسا لتوسع نطاق الدعم. لليوم، المنظمة أنقذت أكتر من 20,000 حياة، غطت كلفة أكتر من 110 عمليات جراحية، وجمعت حوالي 70,000 دولار من التبرعات والرعايات لدعم عيادتها.

١١. عمر عيتاني

أسّس عيتاني FabricAID سنة 2017 ليجمع التياب المستعملة ويوفرها بأسعار رمزية للمجتمعات المهمشة بلبنان والأردن. الشركة عندها 500 نقطة تجميع، وباعت أكتر من مليون قطعة، وحققت عائدات بقيمة 1.4 مليون دولار بسنة 2023. FabricAID بتدير 13 متجر بيع بالتجزئة، وجمعت أكتر من 4 مليون دولار من مستثمرين مثل VIRIDIS Fund Solutions وWamda Capital لدعم توسعها.

12. ياسمين درويش

درويش هي المؤسسة والمديرة التنفيذية لمنصة DonaLeb، اللي بتركّز على اللياقة البدنية والعافية، وبتحفّز تفاعل الموظفين من خلال تحديات لياقة افتراضية، وكل هالشي مع دعم قضايا خيرية. من وقت إطلاقها بـ2022، جمعت المنصة أكتر من 50,000 تحميل و5,000 مستخدم نشط، وتعاونت مع متحف قطر الأولمبي 3-2-1 وعدد من المنظمات غير الحكومية.

13. سارة غانم

سارة وأختها ندى أسّسوا شركة DOODA Solutions بالـ 2018، وابتكروا تقنية مبتكرة باستخدام دودة الأرض لتحويل النفايات العضوية لسماد طبيعي. الشركة عالجت أكتر من 4500 طن نفايات، وبتنتج 3800 طن سماد سنوياً. اليوم، عندها أكتر من 12,000 زبون وحصلت على 300,000 دولار من المنح لدعم مشاريعها.

الرياضة والترفيه

١٤. سدريك زوفيكيان، مارك غاريوس، رالف غاريوس

سدريك زوفيكيان، مارك غاريوس، ورالف غاريوس أسّسوا منصة تيك إت سنة 2021، وهي وجهة شاملة لاكتشاف الأحداث الموسيقية، شراء التذاكر، وحجز الطاولات. خلال أول سنة، سيطرت تيك إت على 60% من سوق الأحداث الموسيقية بلبنان، وجذبت أكتر من 60,000 مستخدم و180 منظم فعاليات. حققت الشركة مبيعات تذاكر بقيمة 1.2 مليون دولار بين كانون التاني وأيلول 2024، وعندها أكتر من 3,000 نقطة بيع منتشرة بكل لبنان.

١٥. كلويه كتيلي

قدمت كلويه كتيلي حفلات ضخمة بكل أنحاء الشرق الأوسط وشمال أفريقيا، ومن أهمها كانت الافتتاحية لعمر دياب وتامر حسني ب 2024. وكمان تم اختيارها لتكون الـ DJ الرسمي لملكة جمال لبنان 2024، واشتغلت مع إليسا في حملة مميزة لدعم وتمكين المرأة.

١٦. ريان حايك

بيقدّم حايك برنامج على يوتيوب بعنوان “بيناتنا”، اللي بيجمع فيه مشاهير عرب، وبلغ عدد حلقاته أكثر من 50 حلقة. ناوي يطلق برنامج يومي تركيزه على القصص الإنسانية، وكمان يوسّع “بيناتنا” ليشمل أوروبا، مع خطط لإطلاق نسخة بالفرنسي قريباً.

١٧. وائل عرقجي

لاعب كرة السلة اللبناني، وائل عرقجي، كان إلو دور كبير بفوز نادي الرياضي بأول دوري أبطال آسيا لكرة السلة، لي ضمنلن مشاركتن في كأس الإنتركونتيننتال FIBA 2024. حصل على لقب أفضل لاعب (MVP) ببطولات مرموقة متل كأس آسيا لكرة السلة 2022 وBCL آسيا 2024. وهوي كمان سفير لعلامات عالمية متل Nike وRed Bull. ومؤخرًا، وقع عقد مع نادي العربي الرياضي القطري بشهر تشرين الأول 2024.

إذا عجبكن هيدا المقال عن أسماء اللبنانيين على لائحة فوربس 2024، شوفوا كمان: نجم كرة السلة اللبناني وائل عرقجي على قائمة فوربس الشرق الأوسط 30 تحت سن الـ 30!