محل بعكار بيعمل فناجين قهوة تراثية ولا أهضم من هيك

نحنا وعم نقلب على إنستاغرام، لقينا محل بعكار كتير مهضوم إسمو Piece Of Passion! محل زغير وقريب على القلب بضيعة رحبة بعكار عم يعمل فناجين قهوة وبرايق بتشبه لبنان، وكل قطعة عندن بتحكي قصة التراث اللبناني بطريقة مميزة. شو في أهضم من هيك؟

هيدا المحل مش بس بيبيع فناجين قهوة، بيبيع ذكريات كمان. القطع عليها عبارات لبنانية متل “صباحو”، “بونجورك بونجر”، و”يا حلو صباحو” اللي بتذكرنا ببيت التيتا بالضيعة، وهيدا الشي لحالو بيفتح النفس على شرب القهوة. عندن مراطبين وفناجين وركاوي، وكل شي مزين بستيل بيجمع الأصالة اللبنانية مع لمسة عصرية كتير كيوت.

من القطع اللافتة بالمحل هني فناجين روميو وجوليات! فناجين شاي وقهوة قزاز على شكل روميو وجوليات. شو في أكتر رومانسية من هيك؟ ولا أحلى فكرة لهدية، خصوصي للعرسان الجداد أو أي شخص عندو شغف بالفن والتصميم.

ذكريات الطفولة بقطع تراثية

وإذا كنتوا من عشاق أيام الطفولة، عندن برايق مهضومة كتير علين صور متل علكة تشكلتس وأونيكا وشوكولا طربوش. هيدي القطع بترجعنا للزمن الجميل، زمن البساطة والأيام الحلوة، وبتصير أحلى ديكور لبيت لبناني دافي.

إذا كنتو عم تدوروا على هدية بتعبر عن لبنان، هالمحل هوي المحل المثالي. كل قطعة فيا ريحة شجر الزيتون والأرز، وأحلى شي إنو هالمحل موجود بعكار، بس بيوصل لكل لبنان كمان. يعني إذا حدا عندو عيد ميلاد قريب، أو بدكن تهدوا حدا على كريسماس، هيدي أهضم فكرة.

الهدف من هالمحل مش بس البيع، هوي الحفاظ على التراث اللبناني بقلوبنا وبيوتنا. فناجين القهوة والبرايق اللي عم يعملوهن مش بس قطع للبيت، هنّي قصص زغيرة من تراثنا اللي منحبو. وإذا عم تدوروا على قطعة تحسسكن بفرحة الضيعة ودفا لبنان، لازم تزوروا هالمحل أو تطلبوا من عندن.

العنوان: رحبة عكار

الرقم: 433 904 76

عجبكن هيدا المقال عن فناجين قهوة وقطع تراثية؟ شوفوا كمان، شو قصة اللبادة يلي كانوا يلبسوها جدودنا؟