بمناسبة عيد ميلاد الشحرورة صباح: كل شي ما بتعرفوه عنها!

إذا بدنا نحكي عن شخصية غيرت وج الفن بلبنان والعالم العربي، ما فينا ما نذكر صباح!

الشحرورة، الأسطورة، والأيقونة اللي كانت سبّاقة بمسيرتها وبستايلها. اليوم بعيد ميلادها، حبينا نستعرض حكايتها يلي مليانة نجاحات وتحديات، وكيف عاشت حياتها بطريقتها .الخاصة من بداياتها حتى آخر يوم بحياتها

صباح، وإسمها الحقيقي جانيت جرجس فغالي، خلقت سنة 1927 بلبنان، وعاشت طفولة بسيطة. موهبتها اللافتة ظهرت من صغرها، وصوتها الجبلي قدر يوصل لكل القلوب. أول مين اكتشف موهبتها الفنانة الكبيرة آسيا داغر من مصر، وقررت تتبناها وفتحتلها أبواب الشهرة، من خلال عقود أفلام سينمائية. وهيك بلشت الصبوحة مسيرتها، والكل صار يعرفها.

لما وصلت صباح ع مصر، كانوا مستغربين من جمالها وصوتها الفريد. لأنو ملامح وجها كانت مضواية كل الوقت، أطلق الشاعر صالح جودت عليها لقب “صباح“، وهيك هالإسم لاقى شعبية كبيرة.

صعود الأسطورة: أفلام، أغاني، ومسيرة مليانة تحديات

صباح ما كانت فنانة عادية؛ كانت أول فنانة لبنانية بتبدع بكل المجالات. خلال مسيرتها، غنت أكتر من 3000 غنية، وقدمت حوالي 87 فيلم و16 مسرحية. تميزت بأغانيها العاطفية، الفرحة، وأغاني الهزج يلي دايماً كانت تفرح الناس. صوت الصبوحة شامل لدرجة إنو غطى كل المقامات، وهالشي خلى كبار الملحنين يتعاونوا معها متل رياض السنباطي، محمد عبد الوهاب، بليغ حمدي، فيلمون وهبي، والأخوين رحباني.

تدربت حتى يلين صوتها الجبلي ويلبق مع المقامات العاطفية. وفعلاً نجحت بكل شي وقدرت تتأقلم مع أنواع غناء مختلفة، لدرجة إنها صارت أيقونة بلبنان ومصر سوا.

الجرأة باللبس وكسر التقاليد

^{Credits: almodon}

قبل ما يكون في أيقونات جريئات متل مادونا أو ليدي غاغا، كانت الشحرورة سابقة الكل بستايلها الفريد. لبسها ما كان أبداً تقليدي، وكانت دايماً تلفت الأنظار بجرأتها. كسرت القواعد، وخلقت موضة لحالها، وصارت رمز للأناقة والثقة بالنفس. ومن اللحظات التاريخية بمسيرتها، لما غنت كأول فنانة لبنانية بمسرح أولمبيا الشهير بباريس بعد ما سبقتها أم كلثوم. هيك أثبتت صباح إنو ما في حدود لموهبتها وشخصيتها.

^{Credits: braichposters}

حياة مليانة صخب: زيجات وحكايات حزينة

حياة صباح الشخصية ما كانت بعيدة عن الصخب. تزوجت تسع مرات، وكانت دايماً محط أنظار الناس. ولما كبرت اعترفت للجمهور ولنفسها إنو زيجاتها كان فيها مصلحة واستغلال، الناس أطلقوا عليها لقب “مدام بنك”. رغم كل شي، قدرت الشحرورة تتابع مسيرتها الفنية وما خلت حياتها الشخصية ومشاكلها وحزنها يأثروا على نجاحها وشغفها.

الإسم اللي دخل موسوعة غينيس

صباح مش بس فنانة كبيرة؛ صباح فنانة نادرة. قدرت تدخل موسوعة غينيس لأنها أكتر فنانة مارست الفن بكل أشكالو ولمدة 75 سنة بدون توقف. كانت تغني وتمثل، وبقيت شعلة من الطاقة والحياة لحديت يوم وفاتها بعمر 87 سنة. مع هالرقم، صارت صباح أكتر من أيقونة، صارت جزء من ذاكرة لبنان والعالم العربي.

إرث صباح ما بيموت

صباح منا حيلا فنانة مرقت وراحت، هي حالة بحد ذاتها. من صوتها اللي كان يملي المسرح، لأفلامها، لأغانيها اللي بعدنا منرددها. الصبوحة بقيت بقلوب الناس، لأنها كانت تعكس جرأة، تفاؤل، وطاقة ما بتنطفي… وحب وحنية. واليوم بعيد ميلادها بالسما، منقلها للشحرورة: ميلادك ذكرى لإرث من الفن والفرح، وإسمك رح يضل نجم ما بيغيب!

بتحبوا الصبوحة؟ شوفوا: بتعرفوا شو كان أول فيلم للشحرورة صباح؟ خلينا نتذكر!