شيف عمرها 3 سنين عم تعمل كمونة بندورة جنوبية!

رح نخبركن عن طفلة لبنانية رح ترسم البسمة ع وجكن! جيمي عيسى هي شيف لبنانية وعمرها 3 سنين بس. بتحب تطبخ وبتقضي وقتها بالمطبخ عم تعمل محتوى مع إمّها! قررت الشيف جيمي تعملنا وصفة  كمونة البندورة الجنوبية كطريقة لتعبّر عن حبّها ودعمها للجنوب.

هالطبق النباتي الشعبي محبوب بالجنوب اللبناني وباقي الضيع بلبنان. هو إختصاص أهل الجنوب ووصفة إنتقلت عبر الأجيال. واليوم، الشيف جيمي الشطورة رح تخبرنا عنّا.

هيك فيكن تحضروا كمونة بندورة حسب شيف جيمي:

هالأكلة الجنوبية فيها برغل ناعم مخلوط مع البندورة، البصل، والفليفلة الحمرا. الأعشاب الطازة متل النعنع، مردكوش، والحبق بيعطوا نكهة وريحة منعشة وطيبة. بيضيفوا فوقن الكمون المطحون، الفلفل الأسود، الشطة أو البابريكا لنكهة حدة. مزيّن بزيت الزيتون، هالطبق خفيف بس مشبع، مثالي كمازة مع الأكل أو لحالها مع الخبر المرقوق.

الشيف جيمي تفننت بهيدي الوصفة اللبنانية التقليدية (لأنو هي عملتو، اكيد). منتمنى هالفيديو يجيبلكن فرحة، ويحمسكن تجربوا شي جديد لسفرتكن، ويساعدكن تتعرفوا على تقاليد الجنوب!

تأكدوا من أنكن تطلعوا على باقي وصفاتها السهلة والممتعة! عنجد كتير هينة، حتى الزغير فين يعملها. صحتين!

شوفوا كمان، كمّونة البندورة، أكلة بلدية من فخر السفرة الجنوبية!