خيو لرامي الشمالي ع مسرح “إكس فاكتور”: أداء مؤثر ودموع من رحمة رياض!

بتتذكروا رامي الشمالي؟ نجم ستار أكاديمي ٧ اللي كسرلنا قلبنا لما مات بحادث سيارة بمصر؟ كان بعدو بالعشرينات وصاحب الصوت الحنون والدافي، بس الحادث سرقو منا ومن رفيقو محمود شكري اللي كان معو بنفس السيارة وقتها، وكان رامي عم يحضر يسجل أول أغنية إلو بمصر.

بعد وفاة رامي، ما قبل خيو شادي الشمالي يخلي ذكرى رامي تنتسى هيك، فقرر يكمل مشوارو الفني لرامي عطريقتو الخاصة. وهالسنة، قرر يشارك ببرنامج “إكس فاكتور” ليكون هالصوت الحلو موجود من جديد، ويخلي ذكرى رامي عطول موجودة.

لجنة التحكيم بإكس فاكتور جمعت بين الفنان اللبناني راغب علامة، الإماراتي فايز السعيد، والعراقية رحمة رياض اللي الكل بيعرفها وبيحبها وكانت صديقة رامي الشمالي بالأكادمية.

وأكتر لحظة مؤثرة كانت لما شادي غنى “بحبك أنا كتير” لوائل كفوري، بكل حب وحنية… وصوتو ذكر كل الحاضرين برامي.

رحمة اللي بتعرف شادي من وقت كان عمرو ١٠ سنين ما قدرت تخبي تأثرها. بكيت وهيي عم تتذكر صوت خيو اللي راح وتمنتلو لشادي طولة العمر.

شادي الشمالي اليوم عم يكمل طريقو، وصار عندو آلاف المتابعين ع انستغرام. أما رامي اللي تركنا بسنة ٢٠١٠، ذكراه بعدها موجودة بقلوبنا، وصوتو بعدو حي بصوت خيو شادي، اللي قرر يخلي حب الناس لرامي مكمل معنا.

شوفوا كمان، بعد إهانة جمالها… ندى كوسا استرجعت حق لبنان بمسابقة ملكة جمال الكون.