شو قصة اللبادة يلي كانوا يلبسوها جدودنا؟

شو قصة اللبادة؟ هالقطعة التراثية يلي كانوا يلبسوها جدودنا رمز من رموز ثقافتنا، بتاخدنا ع أيام زمان. لوقت ما كان لبنان فينيقيا ولوقت ما كان الشعب اللبناني عم بخوض البحار وينشر الثقافة والتجارة والعلم، اللبادة عاشت بهل فترة وانتقلت من جيل لجيل، وصارت رمز للتقاليد اللبنانية، خاصة بجبال لبنان مطرح ما البرد والشتا كانوا يبقوا قاسيين لدرجة إنو في ناس كانت تموت من البرد. ليش كانت هالقطعة التراثية مهمة بالحياة اليومية؟ وكيف استمرت كل هالفترة؟

شو هي اللبادة؟

اللبادة منا بس قطعة منغطي فيا راسنا! هي غطا تقليدي مصنوع من صوف الخروف، بينلف على الراس بشكل مخروطي. هالقطعة كانت شغلة أساسية، خاصة عند الناس اللي كانت ساكنة بالمناطق الباردة والعالية، وكانت بتساعد كتير وقت الشتا لأن الصوف يلي فيها مقاوم للمطر والشتي والبرد وحتى التلج. شو سرها؟ سرها إنّها مصنوعة من تحت ديّات حرفيين، من دون أي قالب أو مكنة، يعني شغل يدوي بكل معنى الكلمة.

كيف انعملت؟

لتنعمل اللبادة، بدنا حوالي ٤٠٠ غرام من صوف الخروف، مفصول عن بعضو ليرجع ينقع بالصابون البلدي، ويصيروا الصوف والمي والصابون متل العجينة. هالعجينة بتتضرب وبتندق بإيدين الحرفيين لحتى تتماسك وتاخد الشكل المطلوب.

^{Credits: alquds}

إسم “اللبادة” جاي من فعل “لبّد” باللغة الفينيقية، يعني ضرب وخلط، وهيك بتصير “اللبادة” متينة وقوية. وبالأخير، بتنلف قطعة قماش بيضا أو سودا على الجبين، ليعطيها الطابع اللبناني الأصلي.

^{Credits: alquds}

اللبادة رمز لبناني

عكس الطربوش اللي يعتبر عثماني، اللبادة أصلها لبناني، واستخدمها الشعب اللبناني لقرون طويلة. كانت موضة عامة، بيستعملوها الناس من مختلف الطبقات، وكمان العسكر. ومع الوقت، الطبقة الحاكمة طوّرت زيّ خاص إلها، وبقى اللباس اللبناني يدمج الشروال، الكبرات، العباية، واللبادة كغطا للراس.

^{Credits: 24.ae}

مكانة اللبادة بالجبال

بالمناطق الجبلية، كانت اللبادة أكتر بكتير من غطا للراس أو جزء من الزي اليومي، كانت رفيقة الشتا والبرد. بفضل الصوف يلي فيها، اللبادة كانت مقاومة للمطر وبتحمي الراس من البرد ليضل دافي وبتمنع الأمراض. عاشت هالموضة بالعصور الوسطى خصوصي عند الموارنة بالشمال، ووصلت لعصرنا هلق وصارت جزء من الزي الفولكلوري اللبناني، خاصة بمهرجانات التراث والاحتفالات.

^{Credits: ronahi}

اللبادة بين الشرق والغرب

اللبادة بنسختها اللبنانية بتشبه بعض أغطية الراس التانية الموجودة بدول الشرق الأوسط، متل يلي بيلبسوها الدراويش بتركيا. بس بلبنان، كانت أكتر منتشرة بين المسيحيين بالشمال، خاصة مع اللفة البيضا أو السكارف أو غطا الراس اللي كان ينحط عالراس كمان بالشرق وبأوروبا، وإفادتو متل المحرمة بإنو بينمسح الوجه في وقت اللزوم.

هيدي هي قصة اللبادة، قطعة تراثية كانت تستخدم للدفا والحماية من الشتي وصارت رمز للتراث اللبناني.

عجبكن هالمقال؟ شوفوا كمان، شو أعلى ضيعة مسكونة بلبنان: كانو أهلها يموتوا من البرد بالشتوية!