عين عنوب: ضيعة الينابيع اللي ع قد إيام السنة!

إذا مش سامعين بضيعة عين عنوب، فهلق وقتها تكتشفوها! هالضيعة الحلوة بعدها محافظة عالبركة وعلى البساطة يلي بتجمع بين التراث والطبيعة.

أول شي بيلفتكن بعين عنوب هني المساحات الخضرا المنتشرة بكل مطرح. البيوت التراثية القرميد الأحمر والحجار العتيقة بيعطوا للضيعة هيبة وجمال مختلف.

المي هون ما بتخلص! الضيعة مليانة عيون مي، حتى بيقولوا إنو ينابيعها على قد عدد أيام السنة، يعني كل يوم فيكن تشربوا من عين جديدة.

عين عنوب موجودة بقلب قضاء عاليه بمحافظة جبل لبنان، وبتحد بشامون، وبيناتن ساقية مي بتمرق من الوادي، وبتعطي صوت موسيقى طبيعي بيدلكن عالطريق. المي بتطرب كل مين بيمرق حدها، وإنتو وعم تمشوا بين البيوت الحجر، الدراج الحجر بين الشجر بتخليكن تحسوا حالكن راجعين لإيام الطفولة.

وفيها كنيسة حجر عتيقة بتعكس إيمان وتاريخ الضيعة، وكأنها حارسة للعيون والناس.

وأكيد ما مننسى إنو فيها سرايا قديمة نسيها الزمن، “سرايا عين عنوب” اللي كانت ملك للملك مصطفى إرسلان وخيو محمد.

هالسرايا المنسية اللي تاريخها محفور بحجارة الضيعة، بعدا واقفة تحكي قصص الزمن الجميل.

وما تنسوا، عين عنوب هيي ضيعة الشاعر المعروف طليع حمدان. بيحكوا إنو ولاد الضيعة كانو يجتمعوا سوا، على العرق والأكل البلدي، ويغنوا زجل حتى الصبح. الزجل كان صوت الضيعة، مليان شعر وحب للحياة.

شوفوا كمان، ضيعة من الجنوب: تعرّفوا على ضيعة كفرحونة!