عم تبرموا ع بيت بالحرب؟ خلّوا موقع مأوى يدلكن!

من أول ما بلّشت الحرب، تحول مليون و200 ألف مواطن لبناني لنازح بقلب بلدو، مننّ تهجروا قسراً من بيوتن وغيرن خسر كل شي. واليوم، وحدة من أكبر المصاعب اللي عم يعيشها الشعب بهالحرب هي إنو الناس ما عم تلاقي بيوت تستأجر أو مكان آمن. لقينا موقع ممكن يساعدكن ويكون جزء صغير من الحل أو يخفف عبء ع الناس. رح نخبركن عن موقع مأوى، منصة إلكترونية هدفها تسهيل الوصول لمأوى لكل لبناني. 

موقع مأوى هو منصة إلكترونية هدفها مساعدة الأفراد والعيل إنو يلاقوا مأوى آمن خلال الأزمات والحروب. 

بيوفّر الموقع لائحة محدثة من المنازل والملاجئ المتاحة بمختلف المناطق اللبنانية، هالشي بيجعل عملية البحث عن مكان آمن أسهل. 

المستخدمين بيقدروا يتصفحوا الخيارات المتاحة بناءً على الموقع الجغرافي، عدد الأفراد، أو التكلفة. تم تصميم الموقع ليكون مصدر أمل ودعم خلال الأوقات الصعبة، موفّر وسيلة سريعة وفعالة لتلاقوا مأوى يحمي الجميع.

ومش بس هيك، بتقدروا إنتو تضيفوا مأوى بحال عندكن بيت أو شقة حابين تعرضوها للإيجار أو ببلاش. 

وكمان بتلاقوا خيار التبرّع والمساعدة لمختلف الجمعيات وبمختلف الأهداف. 

تعرفوا على موقع منصة هون. وما تنسوا تشاركوا منصة مأوى مع الناس اللي بتعرفوهن لتوصل للكل! بهيدي الظروف الصعبة وفشل خطط الطوارئ، بتبقى المبادرات الفردية والتكافل الشعبي والحس الوطني هو صمّام الأمان بهالبلد.

شوفوا كمان، هيدي الدول اللي قدمت مساعدات للبنان بالحرب