جدل جديد بسبب وفاء: مطعم حلويات عم بهدد بدعوى القضائية!

أثارت التكتوكر والفود بلوغر وفاء الجدل من جديد بفيديو عمل ضجة كبيرة على السوشيال ميديا، وهالمرة الموضوع كان بخص محل كريب وحلويات. صاحب مطعم “S & More” ظهر بفيديو عم يرد في على زيارة وفاء الأخيرة لمطعمو. وفاء يلي صارت مشهورة على تيك توك بانتقاداتها الحادة، كانت قبل فترة انتقدت صاحبة بسطة وقالت عن أكلاتها “ما بيتاكلوا”، وهالشي خلّى الناس تنتبه أكتر لمحتواها.

هالمرة، وفاء قررت تزور مطعم بتقصدو بشكل دايم حسب صاحب المحل، وصورت فيديو بتنتقد في الكريب والوافل اللي طلبتن، وقالت إنو مش طيبين. نزلت الفيديو على صفحتها، وهالشي أثار غضب صاحب المطعم يلي أكد إنو وفاء هي اللي طلبت تعمل مراجعة للأكل، وما كان متوقع إن يكون رأيها بهالشكل السلبي.

صاحب المطعم ما اكتفى بالسكوت، ورد بفيديو وضح في إنو هو مش بس زعلان، بل ناوي يرفع عليها دعوى قضائية بسبب هالتصريحات اللي اعتبرها ظالمة وغير صحيحة. هالفيديو زاد الضجة، وخلا الناس تتفاعل مع القصة بشكل أكبر على مواقع التواصل.

بعد هالفيديو، صاحب المطعم نزل فيديو تاني عم يحكي كيف الزبونات إجو من بيروت وكل المناطق اللبنانية لدعم المحل بصيدا. لدرجة إنو خلص الطحين من عندو وصار في صفوف من الناس يلي قررت تدعموا بعد الفيديو الجارح.

وعلى فكرة هيدا المحل بيعمل كريب محشية شوكولا دبي الشهير!

المفاجأة كانت لما فتنا على صفحة وفاء وما لقينا الفيديو اللي عمل المشكلة. يبدو إنها شالتو بعد ما شافت الردود السلببة اللي وصلتلها من المتابعين، خصوصي إنو الكل كان ضدها قبل ودعمو صاحبة البسطة بشكل كبير.

لتعرفوا مين هي وفاء شوفوا معنا: من بعد فيديو وفاء، دعم واسع لصاحبة البسطة.